Strålte på Nore Neset
Det blei livsglede og høg stemning på Nore Neset då Torsdagsklubben inviterte til konsert saman med Os Dixiana.
Bildeserie:
Torsdagsklubben er eit fritidstilbod for menneskje med funksjonshemmingar. Eit anna tilbod gruppa har er musikkterapi saman med Terje Neset og Anne Leni Søfteland Sæbø kvar tysdag. Torsdag blei det stor stemning i foajeen på Nore Neset Ungdomsskule då musikkgruppa skipa til konsert for foreldre, støttekontaktar og andre.
– I dag har vi òg gjestar frå Fusa og Tysnes i tillegg til våre eigne, fortalde Bente Borghild Hauge, fritidsleiar for utviklingshemma i Os kommune.
Konserten er eit årleg arrangement i regi av Torsdagklubben.
Fekk musikalsk backing
Det blei stor stemning og svingande rytmer då musikkgruppa med god backing av Os Dixiana klemte til for dei vel 100 tilhøyrarane.
– Musikk er eit universelt språk. Det er ikkje alle av dei som er med som har særleg til språk, men når Terje og Anne Leni drar dei med seg ser du at dei lyser opp og nynner med.
– Eg er utruleg glad for at vi har Terje og Anne Leni. Dei gjer ein fantastisk jobb med gruppa. At vi i tillegg har fått med oss delar av Os Dixiana i dag løftar det enno høgre, strålte Hauge, som hadde pynta lokalet med drueranker i haustfarger.
– Dei skal musikarane få som takk for hjelpa etterpå, avslutta fritidsleiaren.