Strafferettsleg tilrekneleg

Det er TV2 som meiner å erfara at konklusjonen frå dei sakkunnige sin rapport er at den sikta 18-åringen ikkje var psykotisk, psykisk utviklingshemma eller bevisstlaus på tidspunktet for dei påklaga hendingane.

Psykiater Leif Erik Rønneberg og psykiatrispesialist Jan Øystein Berle har på vegne av retten vurdert den mentale helsa til den sikta guten.

- Eg har meddelt dette til min klient. Han tek det til etterretning, seier forsvarar Rolf Knudsen til TV2.

Vil vurdera bevisstlausa

Med den konklusjonen er guten vurdert å vera strafferettsleg tilrekneleg, noko som tyder at han kan dømmast til vanleg fengselstraff eller forvaring. Den sakkunnige rapporten skal no vurderast av den rettsmedisinske kommisjonen.

Til TV2 sier forsvararen at dei vil vurdera punktet med bevisstlausa nærare.

- Han kan framleis ikkje hugsa noko frå den aktuelle kvelden, fortalde forsvararen til Midtsiden då klienten hans blei varetektsfengsla for 8 nye veker den 20. april.

18-åringen anka då fengslingskjenninga til lagmannsretten, men denne blei ikkje teken til følge.

Truleg rettssak i september

Nordhordland Tingrett skal førebels ha satt av den siste veka i september til å gjennomføre ei eventuell rettssak.

På fengslingsmøtet i april fortalde politiadvokat Ørjan Ogne at dei så godt som var ferdige med å etterforska saka og at det berre var nokre rapportar frå dei tekniske undersøkingane som sto att i tillegg til den sakkunnige rapporten.

- Eg reknar med at vår innstilling til statsadvokaten vil bli sendt i løpet av sommaren, fortalde politiadvokaten då.