Storopprydding i Sørstrøno
I Strøno fekk dei uventa god hjelp - i Langedalen ser det ut til å vera nokon som har misforstått fullstendig.
Bildeserie:
Midt i Os kommune si ryddeveke, på den offisielle strandryddedagen laurdag, gjorde ein gjeng frå Sørstrøno ein grundig jobb langs sjøen frå Husfjelltangen til og med Strøneneset.
– I tillegg til plast, isopor og impregnert treverk fann vi to bilbatteri og ein eigarlaus båt, fortel ein av deltakarane, Øystein Skorpen.
No takkar han arbeidsbåtreieriet Samba AS på naboøya for god hjelp.
– Eg kontakta Emil Brimsholm i Samba og han responderte raskt.
– Brimsholm sendte trimaranen Fox Tørres for å hjelpa oss med å få båten fjerna. Eit supert bidrag for å halda den vakre skjergarden vår ryddig og rein!
• Les òg: Elevar fann tatoveringsmaskin på ryddedugnad
Brukte ryddeveka på å kasta plast i skogen
Mens ryddegjengen i Sørstrøno er glad og nøgd har forbipasserande over Langedalen blitt skuffa.
– Her ligg det slengt 5-6 plastsekkar med boss! Det er heilt utruleg at nokon får seg til å gjera noko sånt, spesielt med tanke på alt fokuset det har vore på både plast og dugnadsinnsats den siste tida, meiner innsendar.
Plastsekkane ligg i terrenget og delvis nedi ein bekk på Lysekloster-sida av den kommunale vegen. Området har fleire gongar tidlegare vore utsett for forsøpling.
– Dessverre ligg desse sekkane utanfor sona som kameraovervakinga dekker.