Stor pågang - 112 stengde toalett

Bergen og Omland Friluftsråd går ein travel sommar i møte, når dei fleste nordmenn denne sommaren blir å sjå innanlands.

I pinsen var det tett med telt på fleire friluftsområde, i Ervikane på Strøno var det truleg over 200 overnattande gjestar i telt, hengekøye eller på bakken under eit tak.

– Ervikane var ikkje noko unntak, dei aller fleste plassane våre har vore godt brukt i pinsen, seier dagleg leiar i Bergen og Omland Friluftsråd, Dag Seter.

Førebudd på tunge tak

Det er mykje som tydar på at dei fleste nordmenn kjem til å feriera i Noreg denne sommaren. Med flotte friluftsområder og badeplassar vil nok Bjørnafjorden sine områder vera i flittig bruk. Men med mykje folk, vert det fleire utfordringar.

– Driftsavdelinga vår skal sørgja for tilsyn og vedlikehald av alle plassane som vi rår over, og vi er førebudd på at det vert tyngre tak denne sommaren.

– Grunna smittevernreglane ser vi for oss fleire besøkande enn vanleg, vert det flott vêr i tillegg, vil jo det sjølvsagt bli endå meir trykk på desse friluftsområda. Då kan det bli hektisk, seier Seter.

– Det vi såg i pinsen var nok ein forsmak på det vi kan venta oss.

112 stengde toalett

Med over 200 overnattande gjestar i Ervikane på éi natt vart det merkbart at det gjerne skulle vore fleire fasilitetar, som søppelspann og toalett, tilgjengeleg. Dette vart ekstra merkbart ettersom toaletta på friluftsområda er stengde grunna smitteverntiltaka.

– Det går stort sett greit, men det skulle sjølvsagt vore større kapasitet når utfarten vart så stor som han var. No skal det vera sagt også at våre uteområde ikkje er tiltenkt som campingplassar, sjølv om det er kjempeflott at folk vel å bruka naturen og lærer seg å telta. I tillegg trur eg folk er førebudd på at det er litt meir kummerlege forhold på slike plassar.

– Med tanke på toaletta våre på alle desse uteområda, så har dei vore stengde under denne koronaperioden. Truleg vert alle dei 112 toaletta verande stengde fram til minst 15. juni.

– Vi har prata med fleire kommunelegar, og dei fleste har rådd oss om å fortsetja å halda toaletta stengde, men vi håper å kunna opna dei att etter 15. juni, seier Seter.

Korleis gå på do i naturen?

Om du er på overnatting i naturen, og må på do, korleis går du fram?

Norges Speiderforbund har lista opp ti tips.

Her er fire av dei:

• Gå langt unna stier, teltplasser, rasteplasser og andre steder hvor det er sannsynlig at andre går.
• Finn et sted et godt stykke unna vann (minst 100 m) Det gjelder både bekk, elv eller innsjø.
• Dekk til bæsj og dopapir godt. Legg jorda over, hvis du har gravd et hull, og tramp på den. Du kan gå på do i ei steinrøys, men løft vekk steiner først og dekk godt over igjen etterpå. Er det ikke mulig å dekke til, putt brukt dopapir i en liten pose og ta med.
• Brukte bind og tamponger skal du ta med deg, ikke grav dem ned. Du kan brenne brukt papir og bind og tamponger. Vent gjerne med å legge det på bålet til du er ferdig med å lage mat.

Les heile saka på speiding.no

– Flinke folk og fine område

Opp gjennom åra har folk stort sett oppført seg når dei brukar friluftsområdene.

– Vi må bruka dette høver først og fremst til å skryta av osinar og andre som bruker områda, dei aller aller fleste brukar sunn fornuft og er kjempeflinke til å bruka plassane med respekt, og å rydda etter seg.

– Men det hender ein del gongar at folk gløymer å rydda etter seg, at det flyter med søppel og gjerne glasbrot. Det er sjølvsagt kjedeleg, påpeikar Seter.

– Dei gongane vi opplever reint griseri og hærverk på plassane, vert det sjølvsagt trist og tungt for dei som skal vedlikehalda områda, men dette er heldigvis unntaka.

Med store sjansar for rekordbesøk på friluftsområda denne sommaren, vert det nok fleire auge som kan passa på at folk ikkje driv med griseri og vandalisme.

– Kanskje blir sjølvjustisen så god at det ikkje vert rom for griseri og vandalisme.

– Eg ønskjer alle i Bjørnafjorden kommune ein flott sommar, og så må eg få seia at dykk er veldig heldige som sit på nokre av regionens aller flottaste friluftsområde, avsluttar Seter.