Stor laks står i kø i Os hamn

På låg elv gjekk det nesten eit døgn før årets første laks blei tatt i Oselvo.

Etter dette er det ingen som har fått anna enn tert (liten laks) og sjøaure, som er sett ut igjen.

Årets «Oskar», første laks tatt av medlem i Os jakt. og fiskelag, er med andre ord ikkje tatt.

Mannen som tok årets Oskar i 2016, prisen som er oppkalla etter bestefaren hans, i 2016, klarer snart ikkje venta lengre på at det skal regna nok til at laksen går opp elva.

Visste du ...

... at det er lov å fiska i delar av Os hamn i sesongen, men at du må venta til 15. juli før du har lov å fiska etter laks. Her er reglar og kart for Os hamn.

God trøyst i tung ventetid

– Vi går og trør i regnvatn heile året, men når du endeleg treng litt regn, så får du ingenting. Til og med ikkje i helga, då det var meldt styrtregn, kom det nok til å gi utslag.

– Vi som fiskar i elva har venta i ni månadar, det er jo eit heilt svangerskap. No er vi to veker på overtid.

– Mødre treng ikkje snakka til deg om smerte?

– Nei. Vi er jo ein heil gjeng her som er på veg inn i ein depresjon.

Noko trøst er det likevel å få. Det står mykje laks i Os hamn, klar til å gå opp elva når regnet kjem.

100 laks på vent

– Når ikkje vi kan fiska han, er det greit å sjå han. I går såg eg 80 laks i Os hamn, og det vaka fleire lengre ute, så det står nok rundt 100 laks og ventar på vatn.

– Nokre av dei er ganske store òg, kanskje rundt 10 kilo tunge. Det kjem an på kven du spør, seier Remi, som i går la ut ein video av det eine store beistet.

– Kor mykje skal til for at laksen går på elva?

– Sånn vassføringa er no treng vi sikkert 30-40 millimeter. Det er meldt regn til laurdag kveld og søndag, vi får håpa det kjem nok.