Stor auke av eldre

Kvart år utarbeider Hordaland fylkeskommune si analyseavdeling oppdaterte prognonser på folkeveksten i Hordaland fylke. Medan pilane tidlegare har peikt ein veg, oppover, ser dei i år ein nedgang for fylket totalt sett.

– Dei siste fylkesprognosane for utviklinga av folketalet i Hordaland viser ein nedgang på 70.000 innbyggjarar i fylket i 2040 samanlikna med kva som vart forventa i fjor. Kommunane rundt Bergen ligg an til folketalsvekst, medan kommunar i Hardanger får folketalsnedgang, heiter det i ei pressemelding frå fylkeskommunen.

Står i ein alvorleg situasjon

Trass nedgangen er folketalet i fylket likevel venta å auke med 112 000 innbyggjarar innan utgangen av 2040.

– Når befolkningsprognosane no viser ei svakare vekst så bekreftar det at vi står i ein alvorleg situasjon. Vi treng høgare sysselsetting på Vestlandet. Vi jobbar aktivt med omstilling i Hordaland fylkeskommune, og det arbeidet må fortsette med full kraft om vi skal klare å motverke lågkonjunkturen, og bidra til vekst både i folketal, sysselsetting og verdiskaping, seier fungerande fylkesordførar Pål Kårbø.

I sum er Hordaland venta å vekse med 0,8 % per år frå 2015 til 2040. Dette er eitt halvt prosentpoeng lågare enn fjorårets prognose.

Frontkommunane held fram

Oppbremsinga skjer ikkje i alle kommunane i fylket. Frontkommunane til Bergen vil framleis ha folkevekst fram mot 2040.

– Dei kommunane som i årets prognose er venta å ha høgast vekst ligg utan unntak rundt Bergen. Seks kommunar er venta å ha ein årleg folketalsvekst på over 1 % (Meland, Askøy, Øygarden, Fjell, Sund og Os) og alle ligg i pendlaravstand frå fylkeshovudstaden. Alle seks har hatt positiv nettoflytting i stort sett heile perioden 1998-2015, også innanlandsk. Det er derfor grunn til å tru at veksten i desse kommunane har vore meir «robust» og mindre syklisk enn kommunar som i stor grad har vore avhengig av innvandring for å få positiv nettoflytting. Arbeidsinnvandringa er konjunkturstyrt i langt større grad enn innanlandsk flytting.

Størst auke i den eldste befolkninga

Prognosane seier at innbyggjartalet i Os kommune i snitt vil auka med 1,3% årleg fram mot 2040. Størt blir auken i gruppa over 75 år, kor veksten er spådd til å bli heile 4%.

Slik er prognosane for Os fram mot 2040 (tal innbyggjarar, prosentvis årleg vekst i parentes):

Folkemengd 2015/2025/2040:
19 742/22 893/27 322 (1,3%)
Innbyggjarar 1-5 år: 1 482/1 567/1 757 (0,7%)
Innbyggjarar 6-15 år: 2 785/3 214/3 563 (1,0%)
Innbyggjarar 75+ år: 1 040/1 836/2 795 (4%)