Stoppa isfiskarar
Politiet stoppa fiskarar på isen ved Kysthostpitalet. - Dei var godt utrusta, men valde å avbryte då vi kom, fortel Terje Sperrevik.
Politiet fekk onsdag inn bekymringsmeldinger om folk på isen både på Hetleflotvatnet og i Hovlandsvika ved Kysthospitalet.
- På Hetleflotvatnet fann vi ingen då vi kom, men ved "kysten" traff vi på nokre som skulle fiske på isen, fortel politioverbetjent Terje Sperrevik.
Fiskarane var ikkje særleg nøgd då politiet kom, men valde likevel å avslutta fisketuren etter praten med politiet.
Les òg: Åtvarar mot islagt sjøvatn
- Vi kan ikkje nekta folk å gå på isen, men vi tok ein prat med dei om at isen kunne vera utrygg.
- Dei meinte dei hadde tatt sine førehandsreglar og var godt utrusta, men valde likevel å snu, seier Sperrevik.
Ikkje trygt i Bergen
Bergen kommune driv, i motsetning til Os kommune, ismålingar på vatna i kommunen.
- Dei åtvarar no mot å gå på isen. Sjølv om den kan sjå trygg ut, så treng den ikkje vera det.
- Folk må ta ansvar for eigen tryggleik, slår politioverbetjenten fast.
Årsaka til at Bergen Kommune no åtvarar mot å gå på isen er at vårsola no er sterkare og at iskvaliteten fort blir dårlegare.
Det kan ta berre 15-20 minutt før isen blir såpass dårleg at den ikkje lenger er trygg. Spesielt på grunt vatn er utfordringa stor i følgje Bergen kommune.