Stoppa ikkje for skulebarn

Klokka 12 onsdag kom patrulja frå Os lensmannskontor køyrande på Byvegen ved Os barneskule. I det lysregulerte fortgjengarfeltet ved Best-stasjonen sto det fleire barn og unge og venta på grøn mann.

I det lyset blei raudt for bilistane, var det ein av bilistane som ikkje brydde seg og køyrde likevel.

– Patrulja observerte dette ved sjølvsyn og sørga for å få stansa bilisten. Vedkommande fekk eit forelegg for å køyre på raudt lys, noko som blei godtatt på staden, fortel politioverbetjent Audun Hadler-Olsen.

Tre med for høg fart

Omlag på same tid var UP på oppdrag i bygda.

– Dei sto i Industrivegen og kontrollerte trafikken i retning Ulven. Der blei det skrive to gebyr for manglande bruk av bilbelte og tre forenkla forelegg på fart, kor den med høgst fart køyrde i 67 km/t.

Fann stolen sykkel

I går ettermiddag fekk politiet melding om ein sykkel som var stole.

– Meldar hadde opplysningar om kor sykkelen befant seg, så det var berre for patruljen å reise til den aktuelle adressen. Der fann dei sykkelen og fekk levert den tilbake til eigaren. Det vil bli vidare oppfølging av dei som bur på adressen kor sykkelen var, seier Hadler-Olsen.

Politiet hadde og ein tur til Kiwi på Gudridflaten kor det blei meldt om pågåande tiggarar. Før politiet kom til staden var desse fordufta.