Stolen bil funnen etter tips

Natt til søndag blei to varebilar stolne etter innbrot hos Unik Filtersystem sin verkstad i Landboden i Os sentrum.

Den eine, ein Mercedes, blei funnen parkert på Hjelle same dag. Den andre, ein Volkswagen, blei registrert då den passerte bomringen i Sandviken retning sentrum.

Sidan har den vore sakna.

– Den sakna bilen er den nyaste, og den er godt utrusta og fylt med spesialverktøy og delar, sa Andri Håvardsun frå Unik til Midtsiden i går.

Ho har etterlyst bilen i sosiale media og i lokalavisa. Så kom det tips frå Nesttun.

– Vi vil takka Linde Marie for tipset! seier Andri.

Både Unik og politiet rykte ut til eit nabolag på Elveneset, der bilen sto parkert.

Få skadar - få tjuveri

Etter at politioverbetjent Christine Grindstein hadde sikra spor i bilen, kunne ektemann Jarle Grindstein, som er den hos Unik som bruker servicebilen mest, gå gjennom og sjekka status.

– Vi har ikkje full oversikt enno, men eg trur vi kan seia at vi har vore heldige, seier Jarle.

Nøklane sto ikkje i bilen, men med unntak av nokre små riper nede på eine sida framstår den som uskadd. Ein verktøykasse er stolen, og det var rota i bil og medisinskrin, men også vare av høg verdi ligg igjen.

– Det er spesialverktøy og delar som ville vore vanskeleg å omsetja for ein vanleg mann, men som kostar mykje pengar for oss å kjøpa inn.

– Det verste innbrotet vi har vore utsett for

Dagleg leiar Arne Johnny Boge seier det ikkje er første gong verkstaden deira har vore utsett for innbrot, men at dette er det verste dei har vore utsette for.

– Å mista to firmabilar, og at den eine er vekke fire heile arbeidsdagar, er ganske spesielt.

Tjuvane tok seg inn ved å bryta opp ei dør i porten. I staden for å trykka på ein knapp og heva porten, brukte dei ein elektrisk truck, som dei måtte lada, og pressa porten opp.

Så stal dei nøklar til to av firmabilane. Den eine sto inne på verkstaden, den andre sto ute.

– Det sto ein hengar på bilen som var ute. Dei har tydelegvis ikkje køyrd mykje med hengar sjølv, for kontakten klarte dei ikkje å snu 90 gradar så dei fekk den laus, den klipte dei av, fortel Boge.

No er han glad for å ha begge bilane tilbake på verkstaden, og for at den siste bilen blei funnen i nokolunde grei stand.

Kva spor politiet har å gå etter, er foreløpig ukjent.