STIL med Bergen Fjord Tour
Bergen Fjord Tour, ein 25 kilometer lang turmarsj frå Bryggen i Bergen til Knarvik, blir arrangert laurdag. Bak marsjen står osingane i STIL.
Knarvikmila har utvikla seg frå å vera eit 10 km langt løp til å bli ei heil veke med aktivitet. På programmet står mellomanna 5 km, 10 km, halvmaraton og KnarvikXtrem. Det heile startar med den 25 kilometer lange turmarsjen, Bergen Fjord Tour, frå Thon-hotellet på bryggen i Bergen til målgang på Knarvik stadion.
Teknisk arrangør for turmarsjen er igjen Søfteland Turn og Idrettsforening (STIL).
– Det er ein fin og krevande tur frå Bergen til Knarvik.
– Oddvar Brå gjekk marsjen for to år sidan og han var imponert over den flotte traseen vi hadde funne for marsjen, fortel Arild Fotland i STIL.
Spektakulær utsikt
Løypa går frå Bryggen via Sandviken, Munkebotn til Eidvåg. Frå Eidsvåg går den gjennom terrenget til Rolland og første matstasjon. Vidare går løypa Kyrkjekrinsen skule, som òg er alternativ start for dei som vil gå ein kortare turmarsj (13 km) og til Mellingen over Rimmaskaret til Falkanger og ned mot andre matstasjon ved Tellevik kystfort.
– Traseen frå Mellingen til Tellevik er ei oppleving.
– Første delen gir ein fantastisk utsikt over sentrale delar av Åsane, når ein bikkar toppen får ein ein ikkje mindre imponerande utsikt over fjord og øylandskapet i Nordhordaland, fortel ein entusiastisk Fotland.
Utfordrar Ulvenmarsjen-deltakarar
Siste del av turen går over Nordhordalandsbrua og på lokale vegar/stier fram til Knarvik.
– Vi i STIL oppfordrar alle som har gått Ulvenmarsjen til også å prøva seg på Bergen Fjord Tour, avsluttar Arild Fotland.