Sterkast vind fredag
Det er fare for orkan i kasta dei neste dagane. Fredag kveld ser ut til å bli verst.
Restane etter orkanen «Jonas» blei ikkje så heftige som først venta, men i morgon er eit nytt kraftig lågtrykk på veg inn over Vestlandet.
Frå Stavanger i sør og nord forbi Trøndelag er det fare for orkan i kasta.
Yr og Storm er ganske samkøyrde i meldingane for Os, her er det venta 7-10 m/s (frisk bris) frå sør frå morgonen av.
På ettermiddagen skal vindstyrken auka til 17-18 m/s (sterk kuling) frå sørvest.
- Hordaland ligg førebels litt i randsona av lågtrykket, men også her kan vi venta oss full storm med vindkast på 35-40 meter per sekund, seier Geir Ottar Fagerlid, vakthavende meteorolog ved Meteorologisk institutt i Bergen, til BT.no.
Vinden skal halda seg sterk gjennom natta og fram til formiddagen laurdag, då den skal ned frå 15 til 8-10 m/s.
Våt helg – lettare vêr om ei veke
Laurdag kveld og søndag blir rolegare og kaldare, temperaturen skal ned frå 7-8 plussgradar til 1-3.
Det er meldt ein del nedbør i helga, søndag kan denne koma som sludd eller snø.
Også neste veke blir våt, men frå onsdag eller torsdag skal det letta og vi får minusgradar igjen.