Stenger gangveg
Måndag stenger gangvegen forbi Oseana medan fjellknaus blir sprengt vekk for å gje lys inn i undervisningsromma Kobbavågen og Vargasalen.
For å stetta Arbeidstilsynet sine krav til utsyn frå undervisningsrom stengjer måndag 11. februar gangvegen forbi Oseana.
- Då tek gravearbeidet for å fjerna fjellknausen mot Mobergsvikjo til, fortel kulturhusvert Janne Mari Hjelle.
Ho reknar med at arbeidet vil gå føre seg fram til 22. mars.
- Båe gangvegane framfor Oseana vil bli stengd for publikum, både nede langs restauranten og Griegsamlinga, og oppe over terrassen.
- Vi vil oppmoda publikum som skal gå frå Kuvågområdet til Os sentrum om å nytta Giljavegen og Kolabakkane.
- Elevar ved kulturskulen og andre som nyttar lokala på kveldstid skal framleis nytte kulturskuleinngangen i 1. høgda, seier Hjelle.
Løysingar etter dialog
Endringane som no blir gjort i og rundt Oseana kjem etter ein god dialog med arbeidstilsynet.
- Løysing mot vest, altså mot Mobergsvikjo, er å laga store gode vindauge i fasaden frå rommet vi kallar Kobbervågen. Derfrå vil vi nytta glasvegger inn mot Vargasalen kor kulturskulen sine dansarar øver, forklarte kommunalsjef Geir Engelsen då han presenterte planane i september.
For å få til dette lyt ein altså sprenga vekk fjellet.