Stenger av og bygger om
Er-An Veikro gjekk med årets nybygg frå å vera sesongbutikk til heilårsdrift. Likevel blir det no eit lite avbrekk.
Nye Er-An Veikro, som opna i nybygg våren 2013, har gått frå å vera sesongbedrift frå påske til september til å bli heilårsdriven restuarant.
Men fulle 12 månadar blir det ikkje første driftsår i nybygget.
– Vi har nokre justeringar vi ønskjer å ta, og vil kombinera dette med litt ferie for oss som har hatt eit travelt år, seier Linda Andersen.
I morgon blir siste opningsdag før vegkroa stenger til ut januar.
Selskap og kino
Gravemaskina er allereie i gang på tomta, nedanfor parkeringsplassen.
– Vi vil utvida parkeringsplassen, i periodar har det vore sprengt. Fleire bilklubbar legg dessutan turen til den USA-inspirerte restauranten vår, og då blir det ekstra trangt.
– Også i restauranten vil vi gjera nokre små endringar. Vi har hatt mykje fleire selskap enn venta og vil derfor ha opp ein fleksibel skiljevegg. Då er det lettare å ta imot firma og lag medan delar av lokalet er ope for drop-in-gjestar.
– Då vegkroa var gatekjøkken og vinterstengt budde du og familien halve året på Gran Canaria. Er svolten på sol medverkande faktor?
– He, he! Det er klart at vi, etter over 30 år med Puerto Rico som vår andre heim, saknar varmen. Og ja, ferien går til Kanariøyene, seier Linda Andersen og dottera Hanne Catrine.