Startar på Oseana
Viggo Sandvik og Gøran Fristorp startar Noregsturneen på Oseana torsdag. - Kontrasten mellom oss kan bli artig, meiner Sandvik.
Oseana satsar i sommar på underhaldning på den nyoppretta UteScena på terrassen framfor bygget. Først ut er duoen Viggo Sandvik og Gøran Fristorp med deira tolkningar av dei to legendane og visekunstnarane Alf Prøysen og Evert Taube.
- Det musikalske repertoaret vil i utgangspunktet dreie seg om Prøysen og Taube, med innslag frå Fristorp sitt eige repertoar. Det vil óg vanke nokre låtar som eg har liggande, og som eg aldri tidlegare har spelt ute, røpar Viggo Sandvik på si eige heimeside.
Det er ei spennande samansetning som har vald å legga starten på Noregsturneen til Bjørnefjordens bredd.
Kjent og ukjent materiale
Gøran Fristorp - ein akustisk gitarvirtuos og stor viseprofil. Viggo Sandvik - showmann, Vazelina-veteran og soloartist. Men ein ting har dei felles: Båe er kjende for sine tolkningar av to av Nordens største visekunstnarar; Evert Taube og Alf Prøysen.
- Det kjem til å bli kjende og ikkje fullt så kjende låtar frå dei to mestrane.
- Vi har òg snakka om å "låne" eit par låtar frå kvarandre - altså at Gøran syng Prøysen og eg Taube. Noko av materialet egnar seg òg godt for publikum å synge med på, oppfordrar Sandvik som håpar å sjå publikum i alle aldrar på terrassen framfor Oseana torsdag kveld.
Med seg på turneen som førebels er booka inn på omlag 30 kulturhus landet rundt har dei bandet beståande av Steffen Isaksen på piano, Lena Rist-Larsen på trekkspill og fiolin – og Bjørn Holm på kontrabass. Framsyninga har berre blitt spelt ein gong tidlegare då dei i juni vitja Lund i Stavanger.