Står utan lokale til hausten

Forhandlingane mellom Røde Kors Eiendom og Os kommune førte ikkje til eit tilbod kommunen ville akseptera, dermed er det førebels usikkert kvar legevakta skal halda hus i haust.

– Vi må ut av Røde Kors-huset i Kolskogen i september. Dessverre kom det ikkje ei løysing der vi kunne bli verande til det er klart lokale til oss i den nye brannstasjonen på Moberg, seier lege Sveinung Gangstø.

Gangstø er fagleg ansvarleg for legevakttilbodet i Os. No må han finna midlertidig lokale til vakta.

– Det er mogleg at legekontoret vårt i Os Næringspark blir beste alternativ i denne perioden, men det er førebels ikkje bestemt noko.

Doblar på Moberg

Gangstø og fleire av dei tilsette ved legevakta var onsdag på kranselag i den nye brannstasjonen.

Les òg: – Eit beredskapshus

– Vi ser fram til å koma på plass i nytt lokale.

– Kva blir største forskjell?

– Det blir cirka dobbelt så stort, og vi treng meir plass. Der vi held til i dag er det sånn at ein som for eksempel har fått sprøyte, og skal sitja til observasjon i 20 minutt, må ut på venterommet. No får vi blant anna større venterom og eige observasjonsrom, samtidig som vi får lokale saman med brannvesenet, som kan ha fleire fordelar, seier Gangstø.

Ambulansetenesta blir førebels verande i Røde Kors-huset.

Den nye stasjonen skal etter planen vera ferdig 12.12.2012, men legevakta reknar ikkje med å vera på plass før på nyåret 2013.