Stakk av etter utforkjøring
Ein bil full av ungdomar hamna utfor vegen natt til sundag. Etter eit vellykka søk med hundepatrulje blei det mange å ta blodprøve av.
I 04.30-tida natt til sundag fekk politiet inn ei melding om ei utforkjøring ved Bjørnavegen på Halhjem.
– Då vi kom fram hadde dei som var i bilen stukke frå staden, fortel vakthavande ved Os lensmannskontor.
Patruljen fann eit par av ungdomane, medan hundepartuljen fann resten av dei.
– Ei av dei som var med i bilen blei henta med ambulanse, men ho er ikkje alvorleg skadd.
Kven kjørte bilen?
Ingen av dei som hadde vore med i bilen inrømte å ha vore den som kjørte og det blei gjeve sprikande forklaringar.
Dermed blei alle dei involverte tatt med for blodprøvetaking.
– I dag har vi vore ute og gjort undersøkingar på staden og vi er ved godt mot at vi skal finna ut kven som kjørte bilen. Vi har allereie ein hovudmistenkt.