Sprekt og spenstig
Bildeserie: Det blei eit særs vellukka kretsturnstemne på Kuventræ i helga. Sundag imponerte dei nær 300 turnarane eit rekordstort publikum med fartsfylt oppvisning.
Bildeserie:
For første gong sidan 1982 var turngruppa til Os Turn vertar for kretsturnstemne med lag frå heile Hordaland. Med aktivitar frå fredag kveld til oppvisninga sundag har det gått i eitt for arrangørane.
– Det skal bli godt å setja seg ned no, smilte Anne-Lise Berge frå arrangementskomiteen då det heile var over i halv tre-tida sundag.
Øving, kurs og bankett
Dei første turnarane kom til Kuventræ allereie fredag ettermiddag, der dei blei innkvartert på Kuventræ skule. Laurdagen gjekk med til øving på oppvisningsprogramma og til deltaking på Sumba Gold, kor utøvarane i løpet av berre ein time satte saman eit program dei skulle nytta dagen etter.
– Laurdagen blei avslutta med ein særs vellukka bankett i Oshallen, kor vi fekk svingt oss godt utover kvelden, fortel Berge.
Rekordstort publikum
Sundag var det duka for avslutning på stemnet med defilering frå Meny via Nedre Varåsen til Kuventræ og oppvisning frå 9 troppar på grasmatta på Kuventræ framfor eit rekordstort publikum.
– Eg trur aldri eg har opplevd så mykje folk på tribunen som her, strålte Anne Lise Berge i kapp med sola.
– Også langs ruta frå Meny og opp hit sto det folk heile vegen og helsa oss. Det var vanvittig gøy.
Sprekingar i alle aldra
Underteikna må innrømma at han hadde venta ein høg gjennomsnittsalder og oppvisning type "Trim for eldre", men så feil kan ein ta.
Her var det alt, frå ungdommar i troppane til Loddefjord og Sotra, via piratane frå Hovding til dei stilfulle og ærverdige karane i Noregs Turnveteranar med fullt trøkk og høge løft. Eit og anna linjegymnastikk-variant var det òg, men sjølv desse blei framført med så mykje glød og iver at undertekna sin skepsis blei satt kraftig til sides.
Avslutta med 160
Oppvisninga blei avslutta med vel 160 turnarar frå 13 forskjellige lag i eit felles oppvisningsnummer basert på musikk frå James Bond.
– Det programmet er mykje av det vi skal nytta på Hamar neste helg.
– Vi skal riktig nok ha med nokre andre elementer også, så allereie måndag blir det ny øving i byen, avsluttar Anne Lise Berge.