Spelte mot lag frå Kypros og Sveits
I dag er både A-laget og Os 2 på veg heim frå ein vellykka treningsleir i Ayia Napa.
Bildeserie:
I skrivande stund er Os-spelarane, med trenarar og støtteapparat, på veg til flyplassen Larnaca på Kypros etter ei veke på treningsleir.
– Det har vore ei veldig god veke. Vi liker plassen, banane er gode, vêret er stabilt og fint og vi bur på eit bra hotell, seier hovudtrenar Hassan El Fakiri.
– Det einaste eg har å utsetja på det å bruka Kypros som reisemål for treningsleir er at det har vore litt vanskeleg å finna gode nok lag å spela treningskamp mot.
Fekk lokal motstand, vann 3-0
I fjor blei det internkamp, då det hadde vore dommarstreik på øya. I år spelte Os mot AEK Larnaka.
Kampen gjekk måndag kveld.
– Det blei ei grei gjennomkøyring, synest Hassan.
Os vann 3-0 etter mål av Øystein Takle Pedersen, Glenn Krossøy og Knut Spangelo Haga.
Konkurranseinstinkt og rehabilitering
Treningsleir handlar også om lagbygging, å få nye spelarar integrert i gruppa, og å få tid saman utanom det som går ut på å trilla ball.
– Gutane har bada i basseng og sjø, spelt tennis og vandra litt i gatene. Det har stor verdi for gruppa å vera saman på denne måten, synest El Fakiri.
Kvar dag har det vore konkurransar på tampen av treningsøkta, eller på hotellet på kvelden. Kven treff tverrliggar? Kven er best i quiz?
– Dei har vore delt inn i grupper og konkurranseinstinktet er på topp! Det har blitt både bråk, krangling og klage på at motstandarar har juksa - det er akkurat som det skal vera, seier Hassan og ler.
Fleire av spelarane stilte med skade, men fleire av desse har blitt betre og på fleire måtar fått godt utbyte av reisa. Os har også unngått nye skadar i A-stallen.
Rett heim i NM-kvalik
Os-spelarane landar i ettermiddag, køyrer eigentrening i morgon, for å få reisa ut av kroppen, tar fri torsdag og trener igjen på fredag.
Laurdag er årets første offisielle kamp, då speler Os heime mot Odda i NM-kvalifisering (kampstart kl 14).
Os 2 vann 10-1
I år har også Os 2 vore på treningsleir.
• Les òg: Stallen til Os 2 er tatt ut
Dei har reist, budd og ete saman med A-laget, men elles køyrd sitt eige opplegg.
– Vi har hatt ei fanastisk veke med ni treningsøkter og éin treningskamp. Det er ein veldig fin gjeng å reisa på tur med, seier hovudtrenar Karl Kvile.
Treningskampen gjekk mot eit U19-lag frå Sveits. Os vann heile 10-1.
– Vi spelte ein god kamp og det blei til slutt veldig målrikt. Ting byrjar å sjå veldig bra ut, synest Kvile.
Os 2 startar serien borte mot Juristforeningen søndag 23. april.
• Sjå òg Midtsiden samleside: Os herrefotball