«Spanderer» danmarkstur på veneflokken

– Vi ville ha med ein gjeng vaksne og ungar i ei aldersgruppe som passar saman, seier Linda Ullensvang.

Ho klarte ikkje å slutta å le då ho i oktober vann tur for 50 (!) personar.

Saman med dottera Kine lagde ho gjesteliste og 20 av dei 30 inviterte hadde fri og ville vera med.

– Vi gler oss til turen og til å feira Linda sin 40-årsdag, seier den feststemte gjengen som i dag møtte opp ved Amfisenteret for å ta bussen til Jekteviken for tur med danmarksbåten.

Linda fylte 40 i desember og bestemte seg i oktober for at denne turen fekk bli hennar bursdagsfest. Dottera, mora med kjæraste og svogeren er med, saman med ein god venegjeng av Linda og Kine.

– Fin start i lågsesongen

Det var under ein kampanjedag ved Amfisenteret at Linda vann turen. Fjordline var i Os for å fortelja om eit nytt tilbod ved enkelte bygder i Bergen, der reieriet hentar dei reisande med buss.

Kvar torsdag kjem Fjordline til Os for å henta passasjerar som ikkje vil parkera bilen i by'n mens dei er i Danmark.

– Frå januar til mars har vi lågsesong, likevel har vi på 7 torsdagar, med retur laurdagen, hatt rundt 100 som har brukt det nye tilbodet frå Os, seier linjedirektør Staale Birkeland.

500 per dag

– No i vinterferien har vi ekstra mange som reiser med oss, og fleire tilbod med aktivitetar og underhaldning for born om bord.

I år får Fjordline dessutan sitt første heile driftsår med to identiske båtar etter at Bergensfjord kom i drift i mars i fjor.

– Vi har avgangar kvar dag. No i vinterferien kjører vi 500 frå Bergen til Danmark per dag, til helga er det 700 per dag.

Båtane har 306 lugarar kvar. Om alle lugarar og alle liggestolar er opptatt kan kvar båt ta opptil 1500 passasjerar.

Bluescruise med Gina

I mars skal ei anna dame frå Os på tur med Fjordline. Ho har ikkje vunne tur, men går nok i pluss på heile reisa.

Då kjører nemleg Fjordline eit bluescruise, og blant artistane som skal på scenen er spellemannprisvinnar Gina Aspenes.