– Som ein port til Os
Tanken om bru over Byvegen er ikkje ny. I 2006 serverte Os Næringspark både skisser og sponsorvilje til Os kommune.
Bildeserie:
I samband med reguleringsplanen for vestsida av innfartsåra til Os sentrum frå nord er det forslag om gang- og sykkelbru over Byvegen, frå Holtbrekka til Giskavollen.
Les òg: Planlegg gangbru
Tanken om bru over Byvegen er ikkje ny, i 2006 fekk Os kommune tilsendt både skisser, kostnadskalkyle og sponsorvilje til ei liknande bru.
Ein velkomst-port
Initiativtakar til gangbrua var i 2006 eigarane av Os Næringspark.
– Vi ville kopla næringsparken tettare på Os sentrum samtidig som vi gjorde vegen tryggare for fotgjengarar, fortel Espen Aspenes.
– Vi ser også at ei slik bru kan få ei hyggeleg birolle som eit fysisk velkomstmerke, som ein port til Os sentrum.
Prislappen den gong var på sju millionar kroner.
Vilje og uvilje
Aspenes veit ikkje kva som skjedde med ideen og initiativet etter innsending i mars 2006.
– Vi fekk ingen respons og registrerte ikkje noko form for oppfølging.
I plan- og bygningsutvalet var det i førre veke forslag om rekkefølgekrav, som blei nedstemt, og diskusjon om finansiering av brua.
På spørsmål om interessa for bru framleis er like stor, og om det framleis er vilje til å sponsa, svarer Aspenes ja og nei.
– Vi er framleis interessert i gangbru, men viljen til å sponsa er ikkje den same.
– Vi må vera med å betala på ny rundkjøring og vi ønskjer ikkje to rekningar i samband med ny trafikkløysing.
I 2006 teikna ABO for Os Næringspark ei ny kryssløysing. No er det plan om ny rundkjøring i området.