Søkte med hund etter omfattande hærverk
Politiet fekk assistanse av hundepatrulje etter hærverk i Halhjemsmarka i natt.
I 02.30-tida natt til fredag fekk politiet melding om hærverk på fleire bygningar i Halhjemsmarka.
– Det er utført ulike typar hærverk, blant anna ruteknusing, seier lensmann Oddbjørn Dyrdal.
Politiet fekk gode skildringar av to unge menn. Dei var vekke då patruljen kom fram, og det blei søk området, blant anna med hundepatrulje.
Éin av to mistenkte er pågripen
Patruljen møtte ein som passar skildringane og vedkomande blei pågripen.
– Vi føler oss rimeleg sikre på at vi har rett person. Vi meiner òg at vi veit kven han andre er, seier Dyrdal.
Dei to er rundt 20 år. Mistenkte som blei pågripen sit fengsla og blir avhøyrd i dag.
– Han var rusa og vi tok utvida blodprøve for å sjå om han også var påverka av andre rusmidlar enn alkohol.
Ute og inne
Det er uvisst kor mange bygningar det er snakk om, men éin er spesielt utsett.
– Truleg er det òg gjort noko hærverk innandørs, seier Dyrdal.
– Har personar vore truga av dei som utførte hærverket?
– Nei. Det er ikkje noko som tyder på det.