Snurra ut av vegen
Mista kontroll over bilen på E39 ved Svegatjørn. Blei ståande fast under brua mellom Steinsenteret og Bohus.
Snøvêret sundag har, så langt Midtsiden kjenner til, ikkje skapt dei heilt store problema, men ein bilførar på Halhjemsvegen fekk ein litt ubehageleg oppleving då han mista kontrollen over bilen.
- Eg kom køyrande på E-39 då eg hekta i laussnøen og fekk snurr på bilen.
- Heldigvis kom det ingen i motsett køyrebane, men vi blei jo ståande fast, fortel bilføraren og peiker på bilen som står over grøfta ved siden av vegen.
E-39 skal ha vore dårleg brøytt då uhellet skjedde.
Ingen skadd
Ingen av dei tre i bilen blei skadd i uhellet. Heller ikkje bilen såg særleg skadd ut.
- No ventar vi på redningsbilen, så får vi sjå om han klarar å få oss opp på vegen igjen.
Medan Midtsiden var på staden kom redningsbilen, og ja, sjåføren rekna med at han skulle klare å løfte bilen oppatt på vegen.
E-39 kan bli stengd ei lita stund medan arbeidet pågår.
Det er dels vanskelege køyretilhøve på fleire vegar i Osbygda sundag ettermiddag.