Snoking ved lager
Politiet onsdag: Utlendingar på jakt etter tak-vaskejobb, mann på sykkel i Mobergslio og ein som sprang til skogs då han blei oppdaga rundt eit lager ved Hatvikvegen.
I 1-tida i natt fekk politiet melding om ein som snoka rundt eit lager ved Hatvikvegen.
– Han skal ha opna eller prøvd å opna ei dør då han blei oppdaga. Så stakk han til skogs, fortel politioverbetjent Terje Sperrevik.
Mannen blei ikkje funnen igjen.
Menn med finlandshetter
Også tysdag kveld rundt midnatt fekk politiet melding om noko som blei oppfatta som mistenkeleg.
– Ein innringar fortalte at han hadde sykla forbi ein svart varebil på ei adresse i Hegglandsdalsvegen. Det var folk rundt bilen med finlandshetter på.
Innringar lurte på om bilen matcha den utanlandskregistrerte som politiet har sett etter i høve innbrota i Varåsen, men det gjorde den ikkje.
– Bilen skal ha vore vekke kort tid etterpå og det blei ikkje rykt ut på meldinga.
Ville vaska tak
På dagtid onsdag fekk politiet melding frå både Vågshaugen og Søfteland om utanlandske menn som tilbydde vask av tak.
– Vi rykte ut for å sjekka firma, men då var dei vekke.
Politiet fekk også melding om ein mann på sykkel som "virra rundt" på Mobergslio ein periode, men også han var vekke då patruljen kom fram.