Snikrar på SFO
Elevane på SFO på Nore Neset skule har denne månaden vore i snikkarboden.
Bildeserie:
Men ikkje som stakkars Emil i Lønneberget som ikkje hadde mykje val, snarare tvert i mot. På Nore Neset står ungane i kø for å få lov til å gå i snikkarboden og bruka hammar og spikar.
For både gutar og jenter
- Vi har ein flott snikkarbod her på skulen som ikkje har vore i bruk på ei stund, og det ville vi gjera noko med, fortel SFO leiar Bergitte Hope.
Hope fortel at det ofte var jentene som dreiv med forskjellig formingsarbeid, medan gutane var mindre interesserte.
- Men med snikkarboden ser vi at både gutane og jentene er like engasjerte og det er utrulig kjekt.
Kjekt å lage ting
Mathilde og Tuva synest det er veldig gøy med snikkarbod.
- Det kjekkaste er å få lage ting, akkurat no hjelper eg Tuva med pussinga, fortel Mathilde.
Borna lagar det dei sjølv ønsker, både bilar, båtar, fuglekassar og også meir abstrakt kunst. Nokre veit ikkje kva dei har laga før dei er ferdig.
- Vi vil at elevane skal få vera kreative og få skape det dei sjølv ønsker, fortel Hope.
Ønsker å halda fram
Inne i boden er det ikkje plass til alle borna på ein gong, så dei blir delt opp i grupper og må venta til det er deira tur.
- Alle vil, og det første dei spør om når dei kjem på SFO er kortid boden opnar.
- Og nokre av elevane hadde aldri tatt i ein hammar før, så å sjå dei i aksjon er ekstra kjekt.
- Det starta som eit månadsprosjekt, men etter å ha sett engasjementet blant elevane har vi ønske om å halda fram med å bruka boden, avsluttar Hope.