Sniglar og elefantar i biblioteket

Bildeserie:

Full skjerm

1 av 5

Den siste veka har vore prega av eit ekstra godt kulturtilbod i Os.

Det heile starta laurdag 7. september med Handverksdag og Oselvarfestival, og gjennom åtte dagar har det vore lansering av Os-ordspelet, kajakkpadling og ope hus, historiske leikar og internasjonalt måltid på Lyngheim.

Søndag vart Kulturminnedagane avslutta med dobbelkonsert med jazz-stjerna Marius Neset. (Midtsiden kjem med eiga sak frå den siste konserten)

Dobbel leseglede

På laurdag var det tid for lesestund i Os folkebibliotek.

Arrangørane hadde invitert dei to lokale forfattarane, Vidar Bratlund Mæland og Bjørn Terje Bøe til å lesa høgt for vaksne og ungar.

Mæland er aktuell med boka «Romsnigelen», og Bøe hadde med seg boka «Det er ein elefant i barnehagen».

Dansande bokstavar

Ein fascinasjon for brunsniglar og verdsrommet ligg bak den siste boka til Mæland.

Saman med assistenten og dottera, Oda, tok han publikum og ein snigel med til verdsrommet - og attende.

Mæland var dørgande ærleg på kva for ei utfordring det er å ha dysleksi, og skulle lesa høgt frå ei bok.

– Av og til hoppar orda litt og byter plass, men saman skal vi koma oss gjennom boka saman.

Om Mæland sine planar og ambisjonar held vatn vil det etterkvart gå ein rakett frå Solbakkestova og ut i verdsrommet etterkvart. Med ein lokal brunsigel som astronaut.

BRRRROOOOOOOIIIIIIP!!!!!!

Bøe gav i 2016 ut boka «Det er ein elefant i barnehagen».

I helga fekk publikum i biblioteket vera med på å prøva å løysa mysteriet med den rare lyden som dukkar opp i barnehagen. Karakteteren Maren i boka, er sikker på at det er ein elefant når ho fleire gonger høyrer lyden «BRRRROOOOOOOIIIIIIP!!!!!!».

Dei vaksne er på si side, sikker på at ikkje finst elefantar i barnehagen.

Bøe hausta stor applaus frå dei frammøtte då han til slutt kunne konkludera med at, ja, det er ein elefant i barnehagen.