Smakfullt på Rice
Det var smakfullt både på og rundt tallerkenen då Rice inviterte til prøvemiddag onsdag.
Bildeserie:
I dag opnar RIce Restaurant i Brugata. Onsdag kveld inviterte drivarane Lei Zhang og XiaoBo Wen, saman med husvertane Knut Jarle og Espen Aspenes handverkarar og samarbeidspartnarar til å testa restauranten og maten.
– Eg tykkjer det har gått greit. Vi ville ikkje laga ferdige rettar, men la gjestane få velgja frå menyen slik at det blei mest mogleg likt ein vanleg dag, fortalde Lei etter at dei 25 gjestane hadde fått testa maten.
God kontroll
Litt travelt blei det sjølvsagt, då 25 skulle ha mat og servering samstundes, men Lei og dottera hadde full kontroll. På kjøkenet hadde XiaoBo fått med seg nokre ekstra hender for å ta unna bestillingane.
– Vi har litt ekstra folk inne no i starten for å ta unna. Vi vil jo ikkje at folk skal venta for lenge, så får vi sjå korleis vi organiserar oss etterkvart som vi ser korleis osingane tek i mot oss.
– Eg tykkjer vi har hatt grei kontroll i dag. Det var greit å få denne gjennomkøyringa med gjester som vi kjenner, smilte Lei.
Bidreg til liv på øyro
At maten smakte var det liten tvil om. Eit godt utval av kinesiske retter sto på menyen, blant anna ei suppe frå Lei si heimplass, Shanghai.
Les òg: Ny restaurant nesten klar for opning
– Dette var veldig godt. Også tykkjer eg dei har fått det veldig stilreint og smakfullt her, kommenterte husvert Knut Jarle Aspenes.
– Det er ei stund sida det har vore kinarestaurant på Osøyro, så eg håper osingane vil ta godt i mot dei. Lei og XiaoBo er veldig dedikerte, både når det gjeld maten og interiøret. Lokalet har vore klart ein månads tid, men dei ville ikkje opna før absolutt alt var på plass.
– Det er kjekt at det er nye som vil satsa på Os og som har tru på Os sentrum. Dette blir eit godt bidrag til å skapa liv på øyro, konkluderte Aspenes.
Rice Restaurant har plass til omlag 45 gjestar.