Slutt på sommartid
Natt til søndag skal vi stilla klokka.
Hausten er over oss med regn og mørke kveldar, og snart skal kveldane bli endå mørkare.
Natt til søndag 27. oktober skal klokka stillast tilbake frå klokka 03.00 til 02.00.
Dei som er på nattklubb kan med andre ord snu i døra når det nærmar seg stengetid, og ta seg ein time til, om dei meiner det er forsvarleg.
Tidsminister Mæland
Som ansvarlig statsråd for Justervesenet, har nybakt næringsminister Monica Mæland (H) full kontroll på nøyaktig tid. Klokka blir drive frå Justervesenets atomur, som har ein usikkerheit på cirka ± 0,1 mikrosekund.
– Sommertid blei innført i ei rekke land i Europa i 1916. På denne måten fekk vi lys ein time lengre om sommaren.
– Sånn kunne vi spara litt energi. Argumentet energisparing er ikkje så viktig lenger, i våre dagar, men vi liker lange lyse kveldar, seier nærings- og tidsminister i ei pressemelding frå nærings- og handelsdepartementet.
Fleire land utan sommartid
I Europa var Island lenge åleine om ikkje å justera klokka til sommartid, men i 2011 gjekk også Russland vekk frå ordninga. Også Kviterussland og Ukraina har droppa justeringa av klokka.
I USA og Canada er sommartida utvida med fleire veker.
I Noreg har vi hatt sommartid ulike år og kvart år sidan 1980.
Tidspunkta for skifte mellom normaltid og sommartid er felles for landa i EØS-området og blir bestemt av EU-kommisjonen.
Klokka skal stillast til sommartid igjen natt til den siste søndagen i mars 2014.