Slo Tottenham i Nederland

Dei tre fotballtalenta Alexander Tøssebro, Harry James Moore og Knut Jordal har vakse opp i Lysekloster IL og var del av Os-akademiet før dei på nyåret 2014 gjekk til satsingslaget til FK Fyllingsdalen.

Les òg: Slik ble Fyllingsdalens 13-åringer best i Norge (BT.no)

I helga var Fyllingsdalen sitt 2000-lag einaste norske lag som var invitert til eliteturneringa Samba Cup i nederlandske Rotterdam. Dei tre osingane var del av Fyllingsdalen sin tropp på 15 spelarar.

På høgde med storklubbane

Ti lag, dei fleste frå storklubbar som PSG, Club Brugge og Tottenham, deltok i gutar 15-turneringa.

Fyllingsdalen gjorde god figur, slo heimelaget SBV Exelcior 3-0 og Tottenham Hotspur i gruppespelet og gjekk på eit knipent 0-1-tap for belgiske Club Brugge.

Club Brugge tok til slutt sølv i turneringa som Paris Saint-Germain (PSG) vann.

Britiske Harry fekk pappa til å jubla

– Det største var å slå Tottenham. Pappa er West Ham-supportar og var med på turen, så då sto jubelen i taket, seier Harry James Moore.

Harry er fødd i England og var tre år då familien flytta frå London til Noreg, først til Austevoll, så til Lysefjorden.

Mora, som også er britisk, er Tottenham-supportar, så det var kanskje like greit at ho var igjen heime.

Internasjonal storsatsing

Heime i Noreg har FK Fyllingsdalen fått både positiv merksemd og blitt tema for diskusjon for måten dei bygger eit superlag på.

– Samanlikna med motstandarane i Samba Cup framsto vi likevel som glade amatørar.

– Vi budde på same hotell som Tottenham, og dei hadde blant anna leigd eit eige hotellrom som dei brukte som behandlingsrom med fysioterapeut til 15-åringane sine, fortel Anne Gerd Strand.

Ho er mor til Knut Jordal (og Lysekloster-spelar Johannes Jordal).

Knut, som speler offensiv midtbane, er fødd i 2002 og var truleg yngstemann i heile eliteturneringa.

Nær semifinale

Det var fem lag i kvar pulje og Fyllingsdalen var ein av to klubbar som fekk alle dei fire innleiande kampane sine på éin og same dag.

– Med berre 15 spelarar i troppen blei det rikeleg med speletid, men litt tøft å spela så mykje på så kort tid, seier Harry.

Etter to sigrar og 0-1-tap for Club Brugge tapte Fyllingsdalen 1-3 for ein annan Rotterdam-klubb, Feynoord.

I mellomspelet slo dei Sparta Rotterdam 4-2 på straffekonk etter at det sto 1-1 ved ordinær tid. I kampen som avgjorde 5. og 6. plass kom Alexander Tøssebro og gav Fyllingsdalen 1-0-leiing med ei fantastisk skåring.

– Han førte ballen inn i boksen med brystet og ballen dabba i spiss vinkel før Alexander skrudde den rundt keeper og inn i lengste hjørne. Det var fantastisk å sjå på, synest Harry, som sjølv speler venstreback.

Men danske FC Nordskjælland vann 2-1 og Fyllingsdalen måtte nøya seg med 6. plass i turneringa mellom 10 av dei beste gutelaga i Europa.