Slo eit slag for Redd Barna
Dugnadsånd, gjevarglede, kameratsleg konkurrering - og integrering: Sjå video og bildeserie frå årets Redd Barna Cup.
Bildeserie:
– Eg er utruleg nøgd, sånn som eg har vore alle år, seier Tommy Aasen.
For fjerde år på rad arrangerte den initiativrike, unge Redd Barna-entusiasten, saman med medhjelparar, fotball- og volleyballturnering på Søre Øyane barneskuleog Øyglimt IL sitt anlegg på Sundøy.
– Vi var heldige med vêret i år òg, som alle åra før. Det har hendt at vi har hatt nokre dropar regn, som vi hadde på tampen av dagen i går, men det viktigaste er at det er fint når ungane speler og det er fullt trøkk på heile plassen.
Omgrepet folkefest er kanskje oppbrukt, men passar godt til det yrande folkelivet som blir når lokale eldsjeler og tilreisande deltakarar fyller skule- og idrettsplassen med mat, musikk, leik og idrett.
Alt til inntekt for Redd Barna. I fjor blei det sendt 60.000 kroner til Redd Barna etter cupen, i år ser det ut til å landa på same sum, eller kanskje litt meir, ifølgje Aasen.
– Det er eit kjærkome bidrag og eit flott arrangement. Det er millionar av ungar som bli halde utanfor, anten årsaka er religion, at dei er funksjonshemma eller at dei rett og slett er jenter.
– Eg er stolt og takksam for det Tommy Aaasen og lokalsamfunnet i Øyane får til med Redd Barna Cup, sa leiar for representantskapet i Redd Barna, Magnus Frydnes, i sin tale under arrangementet.
Asylsøkjarar frå Stord takka for at dei fekk koma
Blant dei tilreisande gjestane var asylsøkjarar frå Litlabø og Stord. Gudridur Thorsteinsdottir frå Os jobbar på mottaket på Stord og fann ut at Redd Barna Cup kunne vera tingen.
– Dei frå Litlabø er unge, einslege asylsøkjarar, mens vi på Stord har heile familiar og einslege vaksne. Torsdag kom ein buss frå UDI med 30 nye, og desse er i ein fase der dei ikkje jobbar eller går på skule. Då blei dette ein fin aktivitet, seier Gudridur.
På laget frå Stord, «Heroes», var stemninga på topp.
– Vi er frå Syria, Afghanistan, Eritrea og Palestina. Vi er gode i volleyball, men endå betre i fotball! sa gutane og lo.
– Tusen takk for at vi fekk koma, dette er eit supert arrangement!
Song av Thea og Josefine
«Alle» stiller opp når Aasen lager cup. Lerøy sel laks, far og son Kåre og Karsten Røttingen griller hamburgarar, Anne Elisabeth Røttingen byr på deig og pinne, så du i «Besto sitt hjørna» kan steikja pinnebrødet ditt sjølv.
Hans Marius Johnsen tar med seg musikalske vener, som Kurt Røttingen og Eirik Rolland, og speler musikk. To talentfulle jenter var òg på scenen.
– Josefine er knallflink på elgitar. Eg har hatt ho med meg fleire plassar, både på Madam Felle i Bergen og på Baronsfestivalen på Os, seier HM Johnsen om 15 år gamle Josefine Bø.
Josefine frå Nordstrøno hadde med seg Thea Eidsvåg (15) frå Lysefjorden på vokal. Thea har mindre sceneerfaring enn Josefine, men hadde ei kjempeframføring av Coldplay-låta «Yellow» og Johnny Cash-låta «Hurt».
Deltakarane og vinnarane
Det blei i år konkurrert i fotball, gute- og jenteklassar for kvart årstrinn frå 7 til 11 år, og gatecup gutar og jenter frå 15 år og opp.
Dei vaksne deltar i både sandvolleyball og fotball.
Påmeldte i 2016:
• 30 lag i barnefotball
• 20 lag i gatecup (volleyball og fotball)
Alt i alt: 61 fotballkampar og 19 volleyballkampar - på éin dag - på éin bane.
Vinnarane i gatecup:
Fotball, herrar: FC Bandana
Fotball, damer: Ligge Onna Laget
Volleyball, herrar: Puse Guttene
Volleyball, damer: Klubben
Mest kreative lag:
Fotball: Spara På Skona
Damer: Shalala