Slagkraftig comeback av Aspenes

Os Karateklubb stilte i helga i EM i karatestilarten Wado i Danmark med fem utøvarar, coach Dan Sander Soltwedel og dommar Vidar Mjånes (som tok bronse i kata i fjor).

– Wado er einaste stilarten som har WKF-kreditert EM (godkjent av World Karate Federation/allstyle), fortel Mjånes.

Tre av dei reiste heim med medalje, ein av dei i sin første konkurranse på 20 år.

– Eg hadde lyst å prøva meg på kampmatta igjen, ha noko å strekka meg etter. Det var veldig gøy, seier Oddbjørn.

Han vann semifinalen i veteran -75 kg suverent 5-0 over ein engelskmann, men tapte 0-1 for ein portugiser i finalen.

To medaljar til Armin

Armin Palislamovic, som tok bronse i kata i EM på Kypros i fjor, klatra til sølv i år.

I 2014 blei han skadd i seminfinalen i kamp, der han rauk ut, og kunne ikkje gå bronsefinalen.

I år rauk han ut mot sterk motstand i individuell kamp, men var med og tok sølv i lagkamp.

Henrik Reed-Larsen blei skadd i semifinalen og reiser heim med bronse. Amanda Njøten møtte svært sterk motstand allereie i første kamp og rauk ut.

Arrangerer NM i Oshallen

WIKF Norge, som blir leia frå Os av hovudinstruktør sensei Cato Bruarøy og president Vidar Mjånes, hadde til saman fem utøvarar i finalar. Nora Handelsby (13) frå Sarpsborg tok gull.

I november arrangerer Os Karateklubb NM for lag (uansett stilart) på heimebane i Oshallen.