Skyting med luftvåpen
Ein vektar vart i natt skoten mot, med det som truleg er eit luftvåpen, i Industrivegen.
Like etter klokka 2 i natt fekk politiet melding om at ein vektar i bil var skoten på med luftvåpen i Industrivegen, ikkje langt frå Meny.
– Vektaren melde sjølv frå til politiet om hendinga, og er uskadd. Men det er klart at det er ei skummel hending, seier politibetjent Janne Samuelsen ved Os lensmannskontor.
Det skal vera merke i karosseriet etter det som truleg er kula.
Søkte med hund
– Vi rykka sjølvsagt ut etter meldinga, og søkte med hundepatrulje i området etter gjerningspersonen. Ingen er så langt pågripne, men det er oppretta sak, og vi held fram etterforskinga i dag.
Så langt er det ingen spor etter gjerningspersonen.
Vitner som har sett noko mistenkjeleg i området kan ta kontakt med politiet.