Skvist vekk av dei store?

Tysdag i førre veke blei det opna konkurs i selskapet som har drive Intersport Rosvold det siste året.

I kjølvatnet av Midtsiden si omtale av saka fekk vi høyra rykte om at også G-Sport vil legga ned i Os sentrum.

– Vi har ingen konkrete planar om å legga ned, men G-Sport Os er ein butikk vi har litt fokus på for tida, seier marknadsdirektør i Gresvig, Kjetil Løken til Midtsiden.

Kundane vil ha større butikkar

Løken fortel at kjeden har rundt 165 butikkar, men at det har blitt lagt ned 5-10 butikkar det siste året.

– Nokre butikkar er lagt ned, andre er gjort om.

– Trender er større butikkar, ein marknad vi møter med G-Max-butikkar. Men det er ikkje alltid vi legg ned ein butikk om vi opnar ein G-MAX i nærleiken.

Ser på tiltak

I Os har vi verken XXL eller G-Max, men ein større MX Sport saman med ein mindre Sport1 på AMFI Os.

I tillegg er det nok noko konkurranse frå dei større sportsbutikkane i Laguneparken.

– At Rosvold er konkurs treng ikkje å bety betre marknad for G-Sport på Osøyro. Os sentrum har ikkje A-rating når det kjem til lokalisering.

– Vi har høyrt at de ikkje har fornya leigeavtale på lokalet, og at kontrakten er gått ut. Stemmer det?

– Eg har ikkje oversikt over eksakte datoar, men eg veit at det er dialog med huseigar. Leigekontrakten er blant det vi ser på når vi vil effektivisera på Os, seier Løken.