Skuffa etter Brann-tap
Hassan El Fakiri er ikkje nøgd etter tapet for serieleiar Brann 2.
Bildeserie:
Brann 2 sto utan tap så langt i serien då dei kom til Kuventræ med spelarar som Erik Huseklepp og Kristoffer Larsen måndag ettermiddag.
Os var nær på å bli dei første som tok poeng frå storklubben i år, men det ville seg ikkje heilt.
Kampen starta på verst mogleg måte for heimelaget. Etter berre tre minutt får Kristoffer Larsen så umarkert i bakrommet på eit overlegg frå venstresida og banke ballen utagbart bak Andrew Todd i Os-målet.
Dei unge Os-spelarane viste rett og slett for stor respekt for tippeligaspelarane i starten, men det skulle ikkje gå meir enn åtte minutt før det sto likt i målprotokollen.
Reiste seg
Erik Kanestrøm kom rundt på høgre kanten og la inn, ballen blei klarert rett i beina på Torgeir Lunde som fyrar laus, men rett i ein Brann-forsvarar. Igjen endar ballen hos ein Os-spelar. Denne gangen Emil Halvér som set det sikkert i mål.
Men dei om lag 300 på tribunen var ikkje lenge i himmelen. To minutt seinare er Håkon Lorentzen høgst på ein corner og tek gjestane opp i ny leiing.
No har Os-gutta forstått at dei er på høgde med gjestane og tek over meir og meir av spelet. Etter 24 minutt blir Marius Mikkelsen tredd igjennom. Han fintar av ein forsvarar og set ballen i det korte hjørnet bak Brann-keeperen.
Berre minuttet seinare har Stian Lunde moglegheiten til å ta heimelaget opp i leiinga, men ballen går på utsida av stolpen.
Os - Brann2 3-4 (2-2)
Os sitt lag: Andrew Todd, Anders Havsgård, Torkel Hjertnes, Knut Haga, Glenn Krossøy, Torgeir Lunde, Thomas Fosen (Steffen Ljosheim, 82 min), Emil Halvér, Marius Mikkelsen, Erik Kanestrøm, Stian Lunde (Sander Kvittingen, 79 min).
Andreomgangen starte bra for heimelaget. Etter sju minutt er Marius Mikkelsen farleg frampå, men skotet frå 16 meter blir for svakt.
Etter det tek gjestane meir over. 2-3 kjem då David Gjeraker får stå aleine på 20 meter og kan curle ballen over Andrew Todd i Os-målet.
Berre minuttet seinare blir Brann tildømt straffe. Ei staffe Erik Huseklepp set i mål via stolpen til høgre for Todd, men igjen viser Os at dei ikkje har tenkt å gje seg utan kamp. Fem minutt seinare blir Emil Halver spelt igjennom og løfter ballen lett forbi Brann-keeperen.
Tre minutt seinare kan det diskuterast om Os ikkje burde ha fått straffe når Stian Lunde blir riven ned i feltet. I staden lar dommaren det passere og headinga til Emil Halvér går like utanfor.
Tydeleg skuffa
Når Midtsiden ber Hassan El Fakiri om kommentar veit han ikkje heilt kva han skal seie. Kroppsspråket tydar på ein skuffa Os-trenar.
– Ja, eg er litt skuffa. Vi har ein del av banespelet. Vi skaper sjanser, men vi slepp inn for enkle mål. Det irriterer.
– Vi kan ikkje gjera slike feil som vi gjer i dag, spesielt ikkje mot spelarar som Huseklepp og Larsen. Eg er skuffa over at vi ikkje får med oss minst eitt poeng i dag, seier El Fakiri.
– Samstundes er det mykje bra i dag. Emil er veldig bra og det er mykje positivt, men vi skulle ha våga meir og utnytta mellomrommet endå betre.