Skjebneveke for Idol-Eirik

Onsdag 13. februar blei osingen Eirik Søfteland plukka ut som ein av 40 semifinalistar i årets Idol.

Les òg: Topp 40 i Idol

I morgon, onsdag 27. februar, er det tid for den 4. av dei 5 direktesendte semifinalane, og Eirik håper på god oppslutnad frå heimbygda, for no er det sjåarane som avgjer kven som går vidare.

– Eg såg Betsson hadde 5 i odds på meg. Eg blir glad om nokon satsar pengar på meg og vinn, men bruk heller pengane på å senda tekstmelding, seier Eirik på telefon frå Oslo.

Sjå oddsoppsettet nedst i artikkelen.

Semifinalen er kanskje det minste nålauget Eirik skal pressa seg gjennom i år, å få flest eller nest-flest stemmer av 8 gode deltakarar er ikkje enkelt.

– Det verkar som om det har vore stor interesse for Idol heime i Os og eg er utruleg takksam for all støtta eg har fått. Så får vi sjå om det held til ein av dei ti finaleplassane i morgon.

Travel oppkjøring

Eirik reiste til Oslo søndag og møtte resten av Idol-gjengen måndag morgon.

– Måndag tok vi endeleg utsnitt av låta eg skal synga og intervju til pre-sending onsdag. I dag er det øving med bandet og i morgon blir det meir øving og generalprøve, seier Eirik, som akkurat rakk å spela inn musikkvideo med eitt av dei tre banda sine, KingCalling, før avreise.

Les òg: Kald gigantinnspeling

– Det er veldig god stemning i Idol-leiren. Vi heng i lag og støttar kvarandre, vi er ikkje prega av at vi er konkurrentar, forsikrar Eirik.

På TV også tysdag

Måndag var Eirik over ei dobbelside i Bergensavisen, i dag er han å sjå i BT og Se & Hør.

Også i kveld blir Idol-stjerna frå Os å sjå på TV, TV2 Ettermiddag har i sendinga klokka 19 Søfteland som ein av gjestane sine.

– Fire av oss som skal synga onsdag er gjeste i TV2 Ettermiddag, dei fire andre i God Morgen Norge onsdag morgon. Det var heilt greit å få Ettermiddag-sending, synes B-mennesket Eirik.

Sjå VG Nett sin semifinale-oversikt.

Betsson med mest tru på Charlotte

Eirik skal kjempa mot Charlotte Elisabeth Øveraas, Ola Weel Skram, Camilla Bendiksen Rakbjørg, Christer Dalsbøe, Elise Frantzvåg Karlsmoen, Jonas Joakimsen og Ingebjørg Andrea Vik om dei to plassane.

– Dette ser ut til å bli årets jamnaste semifinale, likevel synest eg Charlotte er den som har imponert mest hittil og får dermed eit svakt favorittstempel, seier oddssetjer Daniel Vassbund frå speleselskapet Betsson.com.

Hos Betsson er Charlotte Elisabeth Øveraas oddsfavoritt til 1,75 i odds framfor Ola Weel Skram til 1,85 i odds.

Ingebjørg Andrea Vik frå Karmøy og Eirik Søfteland frå Os har begge høge odds, men kan overraska.

- Dei må nok opp nokre hakk, men spranget til favorittene er ikkje like stort som i dei andre semifinalane, så her kan alt skje, avsluttar Vassbund.

Går til finale-odds frå Betsson.com:
Charlotte Elisabeth Øveraas: 1.75
Ola Weel Skram: 1.85
Camilla Bendiksen Rakbjørg: 2.50
Christer Dalsbøe: 3.50
Jonas Joakimsen: 4.50
Ingebjørg Andrea Vik: 4.50
Eirik Søfteland: 5.00
Elise Frantzvåg Karlsmoen: 8.00