Skisirkus i Saalbach
Stort løypenett, austerriksk gemutlichkeit og verdas beste afterski - Saalbach er plassen for livlege skiferiar!
Bildeserie:
Skicircus blir det kalla, opplevinga av å boltra seg frå løype til løype mellom Saalbach, Hinterglemm og Leogang.
Over 60 heisar og 200 kilometer med løyper er suverent i forhold til norske anlegg, men ikkje nok til å gjera destinasjonen til den største i Alpene. Likevel har Saalbach mykje ved seg som får både ferske og erfarne skituristar til å venda tilbake.
SJÅ FILSNUTT FRÅ AFTERSKI NEDST I ARTIKKELEN
- Saalbach har det du ventar å få når du reiser på skiferie i Alpene; stort løypenett med god variasjon av nivå, rikeleg utval av restaurantar og ein uslåeleg afterski , seier Jan Trygve Drønen.
Lett å velja
Jan Trygve fungerte som reiseleiar då underteikna var på sin første tur ut av landet for å stå på ski. Sjølv om Drønen har besøkt rundt 10 skidestinasjonar i Austerrike, Sveits, Frankrike og Canada syntes han det var lett å bestemma mål for årets tur for dei åtte i reisefølgjet.
- Sjølvsagt er det plassar som har endå betre skiforhold, spesielt om du vil stå utanfor løypene, men den stemninga Saalbach har å by på er heilt unik.
- I tillegg er det ein fin destinasjon for reiselag der nokon er betre enn andre å stå på ski, for her er det mykje å velja mellom.
10-doblar med sjarm
Saalbach er ein liten landsby som ligg knappe to timar med bil søraust for Salzburg. Med 3100 innbyggarar og over 30.000 varme senger er staden for turistmaskin å rekna, men bortsett frå tettleiken av hotell, restaurantar, sportsbutikkar og hütten i løypene er det ikkje lett å merka at dette er ei bygd som tidoblar folketalet sitt vinteren gjennom.
Alt er lagt til rette for god flyt, både når du skal i skiheisen, i gondolen, leiga ski eller ta deg ein pause. Samstundes er det heimekoseleg stemning i heile dalen, og ikkje berre blant dei som er på jobb for å metta turistane.
Byen og bakkane
Du kan ta heis eller gondol frå tre ulike hjørne av Saalbach, men byen er så liten at det er som ein spasertur gjennom Osøyro. Den største forskjellen er at nesten alle du treff på har ski på skuldra eller brett under armen, og alle bygningane du passerer er anten hotell, restaurant eller sportsbutikk.
Frå Saalbach kan du stå på ski ein heil dag utan å ta same heis to gongar. Du kan for eksempel stå på nordsida av dalen vestover mot Hinterglemm, kryssa over til sørsida av dalen tilbake, og blant anna kjøra VM-løypa frå 1991.
Vidare går turen forbi Saalbach og austover ned den lengste løypa i sirkuset (7,5 km) til Vorderglemm for så å koma deg over toppen, ned til Leogang, opp igjen og vestover tilbake til Saalbach. Der du i 16-tida stoppar på afterskiplassen Hinterhag Alm, som ligg 200 meter oppe i bakken frå sentrum.
Opp på bordet!
På legendariske Hinterhag Alm, som i 29 år har servert skituristar noko å varma seg på etter ein lang dag i bakken, startar showet presis klokka 16. Bandet går på scenen og dei som bestilte mykje å drikka dagen før har fått reservert seg eit bord på det som på kort tid blir ein ”låve” der folk står som sild i tønner.
Gamle slagarar og austerrikske drikkeviser pumpar ut av høgtalarane og på nokre av låtane er det obligatorisk å stå på benkar og bord og dansa. To timar seinare er det over. Fok trakkar på seg skia for å eta middag på hotellet eller for å halda fram festen på Castello, Alibi eller Zum Turm. For så å ta tidleg kveld og vera klar for ny skidag neste morgon.
Reise og prisar
Trass i godt afterskitilbod er Saalbach heilt klart ein fin plass å ta med ungar. Vi reiste fire par på tur, utan ungar, og valt derfor berre å vera vekke frå onsdag til sundag. Det er ikkje mange hotell som tilbyr anna enne laurdag til laurdag, men Hotel Kolmais, som hadde både store, fine rom, basseng og badstove og eit fantastisk kjøkken, tok imot oss.
Vi betalte rundt 120 euro per person per natt, inkludert frukost og 4-rettars middag kvar dag. I staden for å fly til Salzburg, som er nærmast, reiste vi via København til Munchen og betalte 1800 kroner t/r. Vi vurderte leigebil, men fann ut at det kosta om lag det same, 700 kroner per person, tur-retur med minibuss. Denne turen tok cirka to timar kvar veg.
For tredagarskort i løypene betalte vi 115 euro. (40 euro for dagskort, 200 for 6 dagar)
Om Saalbach
Innbyggjarar: 3.100
Høgde over havet (sentrum): 1.003 m
Høgaste kjørehøgde: 2.096 moh
Heisar/løyper: 62 stk/200 km
Svarte løyper: 6 stk
Raude løyper: 40 stk
Blå løyper: 28 stk
Restaurantar: 68 stk
Fjellstover: 44 stk
Barar/diskotek: 38 stk
Sjå òg: www.saalbach.com
VIDEO: Ver så snill - stå med slalåmstøvlar på benkar og bord og ta deg ein dans! Det er ikkje rart at Hinterhag-Alm er kåra til verdas beste afterski - like god stemning kvar dag! (Mobilfoto: Kjetil Vasby Bruarøy)