Skeptiske bergenspolitikarar vitja Lysekloster skule

I november blei det kjend at byrådet i Bergen vil legga ned Nordvik skule i Fana og flytta elevane over kommunegrensa til Lysekloster skule.

Som å gje vekk Nordvik til Os

Torsdag i førre veke var politikarane i Komité for skole, barnehage og idrett i Bergen kommune på synfaring i Nordvik og på Lysekloster.

- Nordvik skule bør oppretthaldast. Å flytta elevane til Lysekloster blir som å seie til Terje Søviknes at han kan få Nordvik. Både eg og Søviknes er FrP-arar, men dette vil eg ikke, sa Eiler Macody Lund (Frp) i følgje Fanaposten etter befaringen.

Har Lysekloster plass?

På Nordvik møtte bergenspolitikarane rektor Harald Borge, FAU-leder Kåre Aarland og FAU-medlem Herman Brandt. Brandt hadde, i følgje Fanaposten, sett på utbyggingsplanane i Os og meinte at ei eventuell flytting til Lysekloster ikkje er ei varig løysing.

– Rundt Lysekloster skule skal svære områder byggast ut med bustader. Dette er planar som er langt i prosessen og som vi veit kjem. Faktum er at Lysekloster skule vil ha problem med å få plass til eigne born om nokre få år. Kor skal Nordvik-borna gjera av seg då? undra Brandt i følgje Fanaposten.

– Skal sjølvsagt bli her

Varaordførar Marie Bruarøy (H) møtte saman med administrasjonen, rektor og representantar frå FAU ved Lysekloster skule bergensdelegasjonen etter at dei hadde vore på Nordvik skule.

– Vi presenterte skulen og gav dei ei omvisning. Det var kjekt å visa fram ei heilt ny skule med eit så flott uteområde som det vi har ved Lysekloster skule. Vi har all grunn til å vera stolte av den.

– Signalet frå oss var tydeleg. Om Bergen ønskjer å flytta elevane frå Nordvik, så skal vi snu oss rundt og ta vel i mot dei.

– Kva med påstanden om at dei kan bli "kasta ut igjen"?

– Vi fekk det spørsmålet. Om vi tek imot elevane frå Nordvik, så hiver vi dei sjølvsagt ikkje ut att. Det er trass alt ungar vi snakker om. Dei skal ha ein forutsigbar skulegang og skal sjølvsagt bli verande på Lysekloster.

– Vi har planlagt Lysekloster skule for vekst, med den uinnreidde 2. etasjen. Ei auke i elevtalet vil utløysa byggetrinn 2. Den dagen Lysekloster eventuelt blir full, så skuldast ikkje det elevane frå Nordvik, forsikrar Bruarøy.

Vil bli bussa

Skulevegen forbi Sørstraumen er allereie eit tema i politiske møter i Os kommune.

– Kva vil eventuelt skje med elevane frå Nordvik med tanke på skulevegen?

– Denne vegen er allereie definert som farleg skuleveg, så elevane som bur i området mot Nordvik får allereie skuleskyss. Om vi tek over elevane frå Nordvik, så vil den ordninga berre bli utvida, inntil vi klarar å få vegvesenet og fylkeskommunen med på å gjera noko med fortau langs Sperrevikvegen.