Skaper trivsel i skulen
Bildeserie: 200 elevar frå barneskulane i Os blei tysdag skulerte som trivselsleiarar. Det var eit yrande liv i Oshallen då dei lærte nye aktivitetar.
Bildeserie:
Søfteland skule var den skulen i Os som først tok i bruk opplegget med trivselsleiarar i storefri.
– Dei andre skulane har hengt seg på etterkvart og i dag er vi samla med omlag 200 elevar i Oshallen for å læra forskjellege aktiviteter som ymse ballspel, dansar og liknande, fortel gründer May Linda Haugsdal.
Starta på Kalandseid
Haugdal har bakgrunn som lærar frå Kalandseid skule, kor ho i 2007 starta med opplegget som i dag har blitt landsomfattande med 900 deltakande skular.
– Ideen bak er at elevane skal vera i aktivitet i friminutta.
– Eg trur fysisk aktivitet er med på å byggja eit betre skulemiljø og venskap på tvers, forklarar Haugsdal.
Ingen skal gå aleine
Dei 200 elevane frå barneskulane i Os er plukka ut i klassene sine og skal gå føre som gode forbilder. Samstundes skal dei vera dei som set igang leiken i friminutta.
– Det er ikkje eit fast opplegg som skal køyrast i kvart friminutt.
– Elevane styrar sjølv kva aktivitetar dei har lyst å driva med. Det dei får her er eit utval som inspirasjon og som tips til kva dei kan fylla friminutta med.
– Ei viktig oppgåve for trivselsleiarane er å passe på at ingen går aleine i leiken og at alle har nokon å vera med, forklarar Haugsdal.
Samarbeider med særforbunda
Til å halde styr på dei 200 trivelsleiarane har Haugsdal med seg ei brote med vaksne, mellomanna handballspelar Iben Hvidsten frå eliteserielaget FyllingenBergen.
– Vi har eit godt samarbeid med særforbunda som stiller meir enn villig opp med instruktørar.
– Her på Os er det handballforbundet som har stilt med instruktør. På dei tre andre kursa vi har i Hordaland i dag er det andre idrettar som er representert, forklarar Haugsdal.
Hvidsten fortel at det er artig å få komma ut blant ungane og bidra.
– Her er det tydeleg at det er mange som spelar handball frå før, men det er like viktig å få med dei som ikkje gjer det.
– Posten eg har ansvaret for skulle eigentleg vera spel fire mot fire, men så mange vi blei i dag, så blei opplegget litt annerleis, men eg har inntrykk av at dei likar det for det, smiler handballstjerna.
Ungdommar i Vestlandshallen
Også elevar frå ungdomsskulane skal gjennom trivselsleiaropplæringa.
– Dei skal få vera med på ei stor samling i Vestlandshallen neste måndag saman med elevar frå ei rekkje andre ungdomsskular i Bergensområdet, avsluttar May Linda Haugsdal.