– Skal stå ferdig om 20 år
– Det er gledeleg, men også eit typisk partipolitisk utspel dei kallar lekkasje, seier ordførar Terje Søviknes om avsløringa om E39-innhaldet i årets NTP.
Det nærmar seg slepp av Nasjonal Transportplan, ein plan som er venta å innhehalda både midlar til E39 Svegatjørn-Rådal og vidare plan for ferjefri kyststamveg mellom Kristiansand og Trondheim.
Det siste Os-ordførar Terje Søviknes (Frp) har høyrt er at NTP-en blir lagt fram 11. april.
Men allerei torsdag ettermiddag gjekk regjeringa ved kommunal- og regionalminister Liv Signe Navarsete (Sp) ut med informasjon om delar av innhaldet.
- Målet er at heile prosjektet, både ferjefri og opprustning skal stå ferdig innan 20 år, seier Navarsete til BT.no.
– Det er jo eit kanonbra signal, seier Søviknes til Midtsiden.
– Men framtidige løyvingar er avhengige av framtidige regjeringer. Med mindre dei gjer det vi meiner dei bør gjera, trygga framdrifta ved å gje økonomiske rammer som sikrar ferdigstilling av heile dette store prosjektet.
– Det vil nok dessutan bli ein drakamp om finansieringa. Det er opplagt at regjeringa legg opp til bompengefinansiering, medan vi meiner staten skal ta rekninga.
Søviknes signerte ikkje
For Os sin del er val av trasé mellom Stord og Bergen interessant. Nyleg signerte 15 ordførarar i Hordaland, ifølgje BT.no, saman med byrådsleiar i Bergen, brev der dei går inn for midtre trasé, altså bru over Bjørnafjorden.
– Du har lenge vore tydeleg på at du går for bru, men har ikkje signert. Kvifor ikkje?
– Internt i kommunen argumenterer eg for bru på visse vilkår, men med det kommunestyrevedtaket vi har følte eg ikkje det var rett at eg som ordførar skulle gå inn for éin bestemt trasé.
– Men uttale i forhold til trasé, og om vårt innspel blir tatt omsyn til, er vi alle spente på.
Treng 2,65 milliardar til Svegatjørn-Rådal
Ein annan del av E39 som osingane er opptatt av er ny veg mellom Os og Bergen.
– Nye tal er sendt inn, som viser ei prisauke som gjer at vi treng 2,65 milliardar frå staten for å få finansieringa i orden.
Den andre halvparten av dei 5,3 milliardane vegen vil kosta skal bilistane betala.
– Kva om det kjem pengar, men ikkje nok?
– Eg håper verkeleg at vi slepp å gå fleire rundar etter årets NTP. Om ikkje dei kjem med pengane vi treng, når vi no har ferdige vedtak kommunar og fylket, hamnar vi fort ut på ei ny ørkenvandring med dette prosjektet.