– Skal det vera ein dessert?
Sjømat, sausar og snop: Asia Mat, som opna på AMFI Os i dag, byr på varer for ein kvar smak.
Bildeserie:
Torsdag opna butikken Asia Mat på AMFI Os, den første i bygda med utelukkande asiatiske daglegvarer.
Bukettane strauma på før og etter opning og det gjekk ikkje mange minutta etter at porten blei opna før det sto tett med kundar i butikken.
– Her blir eg fast kunde, seier Kristina Bjånesøy Tikkanen, ein av fleire utan asiatisk opphav som var å treffa mellom dei spennande hyllene.
– Med bakgrunn som kokk er eg interessert i nye smakar, og no slepp eg endeleg å reisa til by'n for å få tak i desse varene. Det er lett å laga nye rettar og eg er vant med å få god hjelp i slike butikkar, legg ho til.
– For ein norsk nybyrjar, kva er enklast?
– Nudlar og scampi, for eksempel. Dei har dessutan mange grønsaker som ikkje finnest i andre butikkar, absolutt verdt å prøva, anbefalar Kristina.
Justerer utvalet etter ønskje
Det er søstrene May Thi Dang og Vang Thi Dang som saman med broren og Quang van Dang i dag opna butikk der Helsekosten heldt til før flytting.
– Vi har jobba dag og natt for å koma i mål, og no, fem minutt før opning, er det berre éin ting som gjenstår, å fylla grønsakene i hyllene, seier Vang Thi.
Dei tre er ferske butikkdrivarar, men seier dei har fått god hjelp av leverandørane til å ta ut varer. I tillegg har Vang ein svoger med bakgrunn frå restaurantbransjen og ho kjenner dessutan varene godt som kunde og forbrukar.
– Det er mange varer vi førebels ikkje har tatt inn, men som vi kan få i utvalet om kundane vil. Det er berre til å koma med ønskje, så justerer vi litt på utvalet etterkvart.
Frå saus til snop
Vi fekk Vang til å ta ein runde med oss i butikken og fortelja om varene.
– Vi har veldig mange sausar, og enkelte typar sausar har vi frå mange ulike produsentar, gjerne same type saus frå produsentar i Thailand, Filippinene, Vietnam, Kina og Korea.
Ho seier dei kjem til å ha oppskrifter liggande i butikken og hjelpa norske kundar og andre nybyrjarar innan asiatisk mat med å finna dei rette varene.
– Vi har også eit stort utval av fisk, sjømat-delikatesser og nokre ferdigsteikte, fryste vårrullar og scampi, som berre er til å varma opp.
I kjøleskapet står blant anna soyamjølk og iste laga av grønn te. Og nokre flasker som ser ut til å vera dressing.
– Det er ikkje dressing og det er ikkje rumpetroll, ler Vang.
– Det er dessert med basilikumfrø, det er berre å vri om korken og ta seg ein slurk, fortel ho, før ho må gå for å hjelpa til med alle kundane i butikken.