Skal brenna bål i protest tysdag kveld

I kveld seier Norge nei til vindkraft, ifølgje ei pressemelding frå Motvind Norge.

Meir enn 600 bål, fordelt over heile landet, skal tennast i protest mot vindkraft i kveld.

Ifølgje Motvind sitt kart, med oversikt over kvar det skal tennast bål, blir det levande lys nær Storevarde på Liafjellet i 18-21-tida i kveld.

– Vi gjer dette for å visa den store folkelege motstanden mot slik utbygging og naturtapet det fører med seg, seier John Fiskvik, leiar i Motvind Norge.

Å tenna varde for å varsla om fare er ein eldgamal tradisjon i Norge, og for Motvind Norge har 8. oktober blitt ein merkedag:

– Å samla heile landet på denne måten er både kraftfullt og sterkt. Enkelte stadar møtest mange hundre menneske, mens andre bål er mindre og av meir privat karakter.

Nytt av året er eit eige program på Motvind Norge sine kanalar, der Gaute Grøtta Grav er programleiar, som blir sendt direkte frå vardetenningar.

– Dette er ein tydeleg beskjed til styresmaktene. Nordmenn vil ikkje ha vindkraft, og det håper vi politikarane tar til etterretning snarast, avsluttar John Fiskvik.