Sjalusi frå 20-talet

Annakvart år den siste tida har elevane ved Kuventræ skule samla seg om eit større show, der kvar klasse stiller med sine bidrag.

Førre gong var det eit stort og flott show i gymsalen ved Os skule, sjå video.

I år skal skulen halda showet sitt i storstova Oseana.

Intensiteten i øvingane aukar fram mot vinterferie og påske, men det er ikkje berre song, dans og musikk det går i.

Fekk hjelp til filmproduksjon

– Det kom ein idé frå ein elev om ikkje vi skulle laga film, fortel kontaktlærar for ein av dei to sjuandeklassane ved skulen, Eli Steinbakk.

– Først trudde eg det var å sikta for høgt, men Patricia Langeland, mor til filmskapar Benjamin Langeland, fekk sonen sitt firma med på opplegget.

Saman med Øyvind Svanes Lunde driv langeland selskapet Noenlunde Film & Media, og fredag var dei to i full aksjon heile skuledagen på Kuventræ.

– Langeland har også laga manus, om ei jente og ein gut som er interesserte i kvarandre. Men så byrjar det ein kjekk ny gut i klassen, og det utspeler seg eit lite sjalusidrama.

Tolmodige filmstjerner

Handlinga er lagt til 20-talet, noko som krev sitt av både elevar og foreldre.

– Eg er imponert over kor flotte elevar som dukka opp til filminnspeling i dag, dette krev også sitt av foreldra, som må setja saman noko som ser ut som om det er frå stumfilm-tida.

– Elevane er dessutan både flinke og tolmodige, dei har nok fått læra at det ikkje berre er action når du er filmstjerne, du må også tola å venta, seier Eli etter ein lang dag i klasserommet.