Siste slurk av Svegatjørn
Sjå bildeserie frå det nesten ferdigtappa vatnet ved inngangen til ny E39 mellom Os og Bergen.
Bildeserie:
Etter tre veker med tapping er 7 meter djupe Svegatjørn nesten tappa heilt ned.
Sjå òg: Midtsiden og Varde sitt webkamera ved Svegatjørn
Onsdag 2. desember byrja pumpene å gå, og renna ned mot Ulvenvatnet fekk, saman med store nedbørsmengder dei siste vekene, fylt seg godt opp.
Onsdag 23. desember er det nesten berre ein dam igjen. Sjølv om dei 8-10 maskinene som står ved vatnet i går såg ut til å få seg ein julepause, gjekk pumpene framleis.
– Arbeidet og tappinga er i rute. Pumpene skal gå gjennom jula, under overvaking av entreprenør, seier prosjektleiar Sverre Ottesen frå Statens vegvesen.
Planen er å starta drivinga av Skogafjellstunnelen i månadsskiftet januar-februar.
Delar av det som var under vatn er prega av gamle synder og tidlegare fylling, rustne oljefat og gamle bildekk ligg i sørenden av vatnet.
I tillegg til gamal forureining er det tydelegvis mykje feilkøyring i området, på ti minutt mens Midtsiden var på staden og fotograferte var det tre bilar som prøvde å køyra på den stengte Ulvenvegen, men måtte snu ved Ulvenparken.
– Vi skal til Lysefjorden, kor køyrer vi då? spurde ein av dei.
Gamal vane står tydelegvis sterkare enn lesing av skilt.
Sjå òg: Midtsiden samleside E39 Svegatjørn-Rådal
Om E39 Svegatjørn - Rådal
• Strekninga er på totalt 17,7 km og skal gå som firefelts motorveg mellom Os og Fana.
• 14,7 av den 17,7 kilometer lange vegen blir i tunnel. Den lengste tunnelen blir den 9,2 km lange Lyshorntunnelen mellom Endalausmarka og Rådal.
• Lengst sør, frå Svegatjørn til Endelausmarka, kjem den 1,5 km lange Skogafjellstunnelen.
• Dagsona gjennom Endelausmarka blir 1,1 km lang. Her kjem også fleire store næringsområde, blant anna Lyseparken på rundt 500 mål.
• Prosjektet omfattar også ny fylkesveg frå kryss i Endelausmarka til Åsenvegen og utbetring av eksisterande fylkesveg 163 for cirka 40 millionar kroner.
• Lyshorntunnelen (9,2 km) kjem i nord ut i Rådal, med ei kort dagsone og kryssområde på 200 meter før den går vidare i 2,2 km lange Råtunnelen. Denne kjem i fjellet vest for dagens vegsystem ved Laguneparken. Ny vegline held fram til dagens riksveg 580 sør for Troldhaugtunnelen.
• Pris 6,5 milliardar kroner (2014 prisnivå), 40/60 bompengar/stat
• Byggestart: Torsdag 3. september (1. oktober i Os) 2015.
• Antatt ferdig i 2022