Siste finish på sjøfronten

Rett etter påske var det innflytting i K-blokka, den siste av dei fire blokkene på den 6000 kvadratmeter store kaien innafor Mobergsneset.

85 av dei til saman 86 husværa er selt, berre ei leilegheit til 3,7 millionar i 4. etasje i J-blokka står igjen.

– Veidekke er ferdig, no held Wikholm Anleggsgartnesmester på med ferdigstilling utandørs, fortel prosjektleiar Karianne Strømme frå StorBergen Boligbyggelag.

Lager klart til Havfest

Brakkene er fjerna og den breie lange brygga på utsida av blokkene er i ferd med å bli ferdigstilt.

– Målet er å få både bryggene og miljøgata frå Os kai til Oseana ferdig til 17. mai, og Festpillene, seier Strømme.

Helga etter nasjonaldagen og pinsen er det nemnleg tid for Havfest, suksess-folkeoperaen frå opningsveka i juni 2011, i ny versjon som del programmet til Festspillene i Bergen.

Redusert biltrafikk

StorBergen held no på med siste del av planlegginga av korleis skjørtet på brygga skal formast for å vera godt nok rusta.

Dei held også på med planen for sjølve gata frå Os kai til Oseana.

– Det skal vera ei miljøgate, ei gate for fotgjengarar, men open for varelevering og eventuell transport av tyngre ting som skal ut i båthamna.

– Men løysinga med biltrafikk under rampen og parkering heilt ute ved moloen har vore midlertidig, det blir lagt til rette for reduksjon av biltrafikken ut til Oseana når miljøgata er ferdig.

40 nye hus til hausten

StorBergen og Os Sjøfront AS er ikkje ferdig med bustadbygging ved Oseana.

Os kommune har kjøpt tomta nærmast kulturhuset, men Os Sjøfront har to tomter nær Os kai inntil Mobergsbakken dei vil bygga på.

Her kjem tre blokker, to på 4 etasjar og éi på 5 etasjar, med til saman mellom 35 og 40 leilegheiter.

– Desse blirlagt ut for sal ut på hausten ein gong, seier Strømme.