Sikra plassen
Med 1-0 siger over Vardeneset sikra Os plassen i 3. divisjon. – No forsvann 50 kilo av skuldrane mine, seier trenar Tore Nielsen.
Os trengde tre poeng på dei tre siste serierundane for å vera sikre på å halde seg i 3. divisjon. Det var det ikkje mange som trudde dei ville ta mot Vardeneset, som ligg på tredje plass på tabellen.
– Vi kjem dårleg i gang og er rufsete det første kvarteret, men resten av omgongen er bra.
– Vi burde strengt tatt hatt meir enn det eine målet til Roar Vestbø, analyserar trenar Tore Nielsen.
God Stian Lunde
Målet kom etter omlag ein halvtime, kor kaptein Stian Lunde spelar Vestbø nydeleg igjennom. Vestbø held hovudet kaldt og set ballen kontrollert inn bak Vardeneset-keeperen.
– Stian tykkjer eg er god i dag.
– Sigeren kjem etter ein kollektiv innsats, men eg må få lov til å trekkje kapteinen fram.
– I tillegg har eg lyst til å nemna Børge Borgen som er solid i midtforsvaret, seier Nielsen.
Utruleg deilig
Med 1-0 leiinga til pause var det viktig for Nielsen å nytta den godt.
– Eg ba gutane halde konsentrasjonen oppe. Vi visste at Vardeneset kom til å pressa på, så eg sa også at vi skulle ta overgangane når dei kom.
– Det gjorde vi, men blei for unøyaktige. Med litt meir råskap og nøyaktigheit burde vi ha punktert kampen i staden for å halde den spennande heile vegen inn.
– At vi no har sikra oss dei tre poenga vi trengde er utruleg deilig, avsluttar Tore Nielsen med eit smil.
Os-Vardeneset 1-0 (1-0)
Gule kort for Os: Håkon Kvittingen, Preben Borgen, Sander Kvittingen.
Os sitt lag: Frode Moberg Øvredal, Børge Borgen, Håvard Grøteide, Mats Lepsøe, Torkel Hjertnes, Håkon Fagerbakke Kvittingen, Preben Borgen, Stian Lunde, Ørjan Glesnes (Sander Kvittingen, 61 min), Egil Thuen (Ramo Racic, 80 min), Roar Vestbø.