Sikra opprykk

Tre år etter at Lysekloster kom tilbake med herrelag i serien var det tid for satsing. No er A-laget klare for opprykk til 6. divisjon.

- Sjølv om vi har lagt i tet nærmast heile sesongen, så har det vore spennande, og det var positivt overraskande at vi klarte å sikra opprykk allereie før siste runde, seier trenar Ørjan Sandal.

Med 1-4-siger over Søfteland på bortebane i går har Lysekloster 31 poeng, 4 meir enn Njardar/Tysnes, som har spelt ein kamp meir.

SJÅ TABELL

På 12 kampar har Lysekloster 10 sigrar, éin uavgjort og eitt tap. Målforskjellen er også imponerande; 57-13.

Frå 1. divisjon til Lysekloster
Ørjan Sandal har erfaring frå blant anna ulike fotballrelaterte selskap, talentsatsing og jobb som instruktør på fotballskulen på La Manga. I vinter fekk Lysekloster engasjert han som sportsleg leiar og trenar for herrelaget, i tillegg har dei styrka stallen med fleire spelarar.

- Engasjementet i Lysekoster idrettslag verka attraktivt, eg takka ja fordi eg såg på jobben med å ta eit lag frå botn av 7. divisjon og oppover i divisjonane som veldig spennande. Idrettslaget har dessutan nytt anlegg, god drift og veldig flinke folk i styre og øvrig organisasjon, meiner Sandal.

Med seg fekk Ørjan broren Thomas. Thomas Sandal var spelande assistenttrenar for SIF, Stavanger-laget som rykte opp frå 2. divisjonsavdelinga Os rykte ned frå.

- Thomas og Harald Haugland, som har bakgrunn frå Gneist og Fana, er med som spelande assistenttrenarar.

Lysekloster har også Thomas Greipsland, som kom til Vestlandet frå Mandalskameratene, i stallen, saman med Ottar Grønvold frå Oslo FK (og tidlegare Sprint, 2. div) og eks. Os-spelarar som Benjamin Holme og Morten Buvik.

- Dette er spelarar eg kjenner frå før, som har flytta til Vestlandet grunna skule eller jobb, og samstundes trappa ned litt. Det har passa godt med vår satsing, og spelarane som var i stallen frå før har verkeleg heva seg med nytt mannskap på laget, seier trenaren.

- Men det er dei lokale spelarane som har drege lasset, 75 prosent av stallen er lokale utøvarar, nokre unge og nokre veteranar. Dei har heva seg og gjort ein kjempeinnsats for å få Lysekloster i toppen, presiserar han.

Tøffe lokaloppgjer
At Lysekloster har vore så tydelege i si satsing har også vore med på å gjera den sportslege motstanden sterkare.

- Eit favorittstempel er ikkje alltid enkelt å leva opp til, i tillegg har andre lag mobilisert ekstra til kamp mot oss, seier Sandal.

Lysekloster har spelt mot blant anna Nore Neset og Søfteland i serien. I dag finn vi tre lag frå Os på dei fire øverste plassane, og lokaloppgjera har vore ekstra engasjerande.

- Måndag 5. oktober har vi siste heimekamp, mot Smørås 3, så då skal vi laga litt show. Den siste kampen går mot Nore Neset på deira bane, den blir også spennande. Vi klarar ikkje stilla med toppa lag i siste runde, men har likevel ikkje tenkt å tapa to gongar for Nore Neset på éin sesong, slår Sandal fast.

Nore Neset er det einaste laget som har slått Lysekloster i år, 3-2 på Lysekloster sin bane. Opprykkslaget satsar på å avslutta sesongen med å visa kven som er best. Denne kampen går sundag 11. oktober (kl 18.00).

Fleire opprykk?
Sandal er klar på at Lysekloster satsar for å rykka vidare opp.

- No skal vi ha flest mogleg med oss på god oppkjøring i vinter, og kanskje styrka stallen endå litt meir før sesongstart 2010.

- Om det så tar eitt eller to år før neste opprykk gjenstår å sjå, men vi satsar på å koma oss vidare, seier han.

Leiar for fotballen i Lysekloster idrettslag, Svein Kollen, er svært nøgd med arbeidet som er gjort til no.

- Eg kan ikkje hugsa at Lysekloster har spelt høgare enn i 5. divisjon, noko dei gjorde på 80-talet. No har vi både anlegg, drift og sportsleg apparat til å koma oss tilbake, seier Kollen.

- Det har vore kjekt å sjå kor dei har vakse som spelarar denne sesongen, både ungdomar og veteranar. I tillegg gror det godt i dei yngre klassane, blant anna med fotballakademiet vårt, legg han til.

I haust er det støyping av ny tribune og bygging av ny parkeringsplass ved det nye anlegget i Lysefjorden.