Signerte avtale med Veidekke

Veidekke fekk noregs største vegkontrakt då dei sikra seg E39 Svegatjørn-Rådal-oppdraget, ein kontrakt til nærmare 2,3 milliardar kroner.

Os Taxi SA har signert avtale med «Noregs største vegbyggarar», ein avtale som omfattar transport for tilsette og gjestar i og rundt Os og Bergen.

Frå 80 til 150 pendlarar

– I hovudsak vil det handla om reise til og frå Flesland for pendlarar. Vi har no 80 pendlarar som bur på hotellriggen i Ådnadalen, dette skal trappast gradvis opp i løpet av 2017 til full bemanning med 250 tilsette, inklusiv underentreprenørar og funksjonærar, fortel prosjektleiar Trygve Slåke i Veidekke.

Etterkvart skal det drivast 10 tunnellar samtidig, då blir det auka aktivitet i og rundt fjella mellom Os og Bergen.

Fleire av dei tilsette som jobbar med E39 Svegatjørn-Rådal jobbar 12-9- og 7-7-turnus. Det er òg nokre på firedagarsveke.

– Med ein fast avtalepartnar som Os Taxi så slepp dei tilsette å legga ut for reisa, vi får mindre administrasjon, betre service og vi aukar sjansen for koordinering av samkøyring, seier innkjøpssjef i Veidekke, Cathrine Norstrand.

Buss og drosje i Os og Bergen

Dette med å koordinera samkøyring har Os Taxi lang erfaring med.

– I februar fekk vi ny avtale med Helse Bergen, som vi har køyrd for i ei rekke år. Også her ser vi etter løysingar som er best for kunden, seier Tor Anders Hauge frå Os Taxi.

Avtalen med Veidekke omfattar òg køyring for Veidekke på den andre sida av Fanafjellet.

– Med samarbeidspartnar Turbuss Vest AS tilbyr vi buss, med samarbeidspartnar Bergen Taxi har vi ekstra kapasitet i Bergen. Vi har innlemma Bergen Taxi i denne avtalen, fortel Øyvind Hellebø.

– Vi har gjort avtale med fleire lokale aktørar i Os og Bergen for å få gjennomført prosjektet, alt frå innkjøp av mat til underentreprise på tungt grunnarbeid. Vi er glade for å få på plass ein avtale med nok ein lokal aktør, seier Norstrand.

Sjå Midtsiden sitt webkamera: Svegatjørn

Midtsiden samleside: E39 Svegatjørn - Rådal