Set inn ekstra buss
Frå i dag kan du ikkje køyre fritt til Bergen. Skyss set inn ekstra buss og legg om ruta for å ta med fleire passasjerar.
Frå onsdag 6. januar klokka 6 til og med fredag 8. januar klokka 22 er det innført datokøyring i Bergen grunna høg luftforureining.
Datokøyring betyr at bilar med nummerskilt som endar med partal (0,2,4,6,8) og oddetal (1,3,5,7,9) får køyre annankvar dag. Onsdag og fredag er partalsdagar, torsdag er oddetalsdag.
Ordninga omfattar all køyring innanfor den ytre bompengeringen, men gjeld ikkje om natta mellom klokka 22 og 6.
Unntak frå datokøyringa
Nokre får unntak frå regelen om datokøyring, dette er:
- Bilar med tre eller fleire personar
- Elbilar
- Hybridbilar
- Køyring knytt til næringsverksemd eller offentleg teneste
- Utrykking
- Pasienttransport
- Transport for funksjonshemma
Bergen kommune oppmodar alle om å la bilen stå medan luftforureininga er høg, sjølv om du har lov til å køyre bil i følgje ordninga.
Lengre tid med bussen
For å ta unna det ein ventar blir ein auka bruk av kollektivtrafikk har Skyss satt inn éin ekstra buss på avgangen frå Os klokka 0630 dei aktuelle dagane.
I tillegg stoppar no Os-bussen på alle haldeplassar mellom Nesttun terminal og Bergen sentrum. Det betyr at kollektivreisande frå Os må rekna med å bruka lengre tid til byen.
Allereie frå 4. januar auka Skyss frekvensen på bussar mellom Os og Bergen. Dette var ei permanent omlegging som var planlagt lenge før luftforurensinga blei tema.