– Ser fram til eit kreativt år

Framleis foregår byggearbeid i det som skal bli kulturskulen sin administrasjon over køyreporten til Oseanasalen på for fullt.

I kjellaren er Vargasalen klar for bruk, med doble vindauge ut mot den mindre Kobbavågen og vidare med utsyn mot Mobergsvikjo.

– Dette har blitt eit mykje betre rom enn det var.

– Her gler eg meg til vi kjem i gang med musikkbarnehage, fortel rektor Christian Breistein, medan han viser fram den nye salen Kobbavågen.

Med vindauge rett ut mot Vikjo og ein liten opphøgd scene i inngangspartiet ser rektor for seg både små framsyningar og skuleavslutningar i den nye salen.

– No gjeld det berre å bli ferdig til skulestart, men arbeidarane har lovd at dei skal vera klare i løpet av 14 dagar, så eg reknar med det går bra, smiler rektor.

Han innrømmer at det blei eit spesielt skuleår i fjor etter at Arbeidstilsynet kravde ombygging av kulturhuset.

Eige band-rom

I dei "gamle" kontorlokala til kulturskulen, ut mot parkeringa mellom Os Sjøfront og Oseana, er dei to nye klasseromma allereie klare og i bruk.

– Her blir det eit band-rom kor vi riggar utstyr for slagverk, gitar og andre instrument som naturleg høyrer til.

– I rommet ved sidan av, kor Noregs Korforbund sitt ungdomskor sit og øver, legg vi opp til instrumental undervising, individuelt eller i små grupper, fortel Breistein.

Kor på ungdomsskulen

Musikkskulen har i tillegg til instrumentundervising og dans også undervising i tre kor.

– Vi har kor for småskulen, mellomtrinnet og ungdomstrinnet. Om der er nokon som har lyst til å byrja å synga i kor så har vi framleis plassar. Det er berre å gå inn på kommunen sine sider og søka.

Også på "Musikk fra livets begynnelse", fløyte og slagverk er det ledige plassar.

– Kora, pluss noko instrumental undervisning, kjem til å halda til i dei nyoppussa lokala på Os ungdomsskule.

– Der tar vi i bruk musikkrommet og fleire grupperom. Sidan vi kjem til å ha parallell undervisning også der, så trur eg vi kjem til å skapa eit godt miljø også der, kor fleire lærarar kjem til å vera på jobb samstundes, forklarer kulturskulerektoren.

Ny danseklasse og ny lærar

Kulturskulen har dei seinaste åra hatt relativt lange ventelister til Patricia Langeland si danseundervisning. Kulturskulen aukar frå hausten kapasiteten med nye danseparti og ein ny talentklasse, slik at dei no har to klassar for dei elevane som har kome lengst.

– Dans har vore, og er, populært. Patricia har hatt opp mot 170 elevar.

– Difor er det veldig kjekt at vi har fått ei av Patricia sine tidlegare elevar, Julia Bergesen, med som ny danselærar i tillegg til Patricia.

– Julia skal jobba hos oss i ei prosjektstilling, i tillegg til å undervisa på kulturskulen i Bergen.

– Vi hadde over 100 elevar på ventelista, men med Julia på plass har vi nesten klart å kutta ventelista, fortel Breistein nøgd.

Totalt reknar rektoren med at det i skuleåret 2013/14 kjem til å gå omlag 500 elevar på kulturskulen.

Litt forseinka

Sjølv om opptaket er klart har ikkje elevane mottatt melding om at dei har fått plass enno.

– Det skyldast at vi har tatt i bruk eit nytt system. Vi hadde opptaket klart før eg skulle på ferie, men eg oppdaga ein systemfeil som gjorde at det ville gått forvirrande meldingar ut til elevane om at dei både sto på venteliste og at dei hadde plass.

– Eg valde difor å venta med å sende ut meldingane, men desse kjem i løpet av dei nærmaste dagane, forsikrar Breistein.

Der vil det òg koma fram kor elevane skal få si undervisning.

– Mykje kreativitet

Ein litt løyndomsfull rektor fortel at han gler seg til å ta fatt på det nye skuleåret.

– Det kjem til å skje mykje spennande i løpet av hausten og vinteren.

– Eg har ein utruleg dyktig og kreativ lærarstab på 18 personar, som har ei rekkje spennande prosjekt på gang.

– Eg kan ikkje røpa noko no, men vi har eit godt samarbeid med Oseana og Ole Tobias (direktør Lindeberg, journ.mrk), så vi kjem til å dukka opp i haustprogrammet til Oseana, avsluttar rektor Christian Breistein med eit smil.