Sendte gratulasjon til Moberg frå Grimstad
Sjølv har Kolskogen fått ein svært god start i ny klubb.
Då Vegard Leikvoll Moberg i går heada inn sigersmålet på overttid for Brann borte mot Skeid, sat ein annan osing og lagkamerat i vinter, 10 år minus 1 dag yngre Ole Martin Lekven Kolskogen, heime hos Erlend Hustad og jubla.
– Erlend bur fint til nede ved sjøen i Grimstad, så vi slappa av i sola før vi rigga oss til med middag og såg kamp, seier Ole Martin til Midtsiden.
– Det var kjempekjekt å sjå at dei vann, og at Vegard avgjorde. Eg måtte sjølvsagt senda han ei melding!
Signerte i Østerrike
I slutten av mars gjekk ryktene om at Kolskogen var på veg vekk frå Brann og opp til Eliteserien.
Då han kom heim frå tur til Østerrike med U21-landslaget blei det stadfesta.
Kolskogen har signert utlånsavtale frå Brann til Jerv ut sesongen.
– Sjølv om eg har spelt over 20 kampar begge sesongane hos Brann, følte eg ikkje at eg var førstevalet, og at det beste var å skifta klubb for å utvikla meg vidare. Agenten min var i dialog med fleire klubbar, og veka før eg reiste til Østerrike hadde eg ein prat med Jerv-trenar og bergensar Arne Sandstø på telefon.
Avtalen signerte han digitalt mens han var i Østerrike. Då han kom heim gjekk ting fort.
– Eg landa i Bergen i 19-tida, klokka 06 neste morgon gjekk flyet til Kristiansand. Der blei eg henta, så var det 30 minutt i bil til Grimstad og Jerv.
Idyll
Etter to veker på hotell i Østerrike blei det éi veke på hotell i Grimstad. Så fekk han seg leilegheit.
– Det er kjempefint i Grimstad. Nesten som heime i Os, med 30 minutt til by'n (Kristiansand), passeleg stor tettstad med fin hamn og mykje båtliv. Eg har ikkje hatt ein einaste dag med regn, og ser fram til resten av våren og sommaren, seier Ole Martin, som sjølv har vakse opp i Hamnevegen, eit innkast frå Oselvo og Os hamn.
Sidan har han ikkje vore heime. Foreldra køyrde bilen hans og eit lite flyttelass til første kamp.
Kampen såg han hos lagkamerat Hustad, som også var nabo og lagkamerat i Bergen og Brann.
Har tatt 6 poeng på 3 kampar
Også sportsleg har det gått bra for Kolskogen i klubben han skåra mot i den lange straffespark-konkurransen der Brann tapte og rykte ned.
Han har spelt alle dei tre første seriekampane frå start, 74 minutt i den første, 90 minutt i dei to neste.
– Eg hadde berre éi skikkeleg trening før første kamp. Så blei eg kasta inn i det, nye medspelarar og ny formasjon.
Det blei heimesiger over Strømsgodset 1-0 i serieopninga, 4-0-tap borte for Lillestrøm og, for to dagar sidan, 1-0 over Kristiansund heime.
Neste kamp går borte mot Vålerenga søndag.
Jerv, som fylte 100 år i fjor, rykte for første gong opp til øvste nivå.
– Mange har spådd oss nord og ned, men mitt inntrykk er at vi er langt betre enn enn det fleire trur. Det er ein liten klubb, men moralen er god. Det har vore veldig kjekt å få ein så god start.
