Semitrailer har velta på Byvegen
Vogntog lasta med stein velta på E39 like nord for Storestraumen. Førar køyrd til legevakta. Vegen er delvis stengd. Kaos på omkøyringsvegane.
Bildeserie:
Torsdag klokka 14.29 blir det meldt om trafikkulykke på Byvegen.
– Ein semitrailer har velta, skriv 110 på Twitter.
Ulykka skal ha skjedd nær Storestraumen på Søfteland.
Ifølgje politiet ligg det stein i vegen. Førar skal ha kome seg ut av bilen.
Kaos på omkøyringsvegane
Midtsiden-tipsarar fortel at det som følgje av ulykka no også er fullstendig kork på omkøyringsvegen om Langedalen frå Joker på Søfteland til Åsen. Det skal det også vera på omkøyringsvegen over Fanafjellet via Lysekloster.
– Bussen har kilt seg fast oppe ved Lysekloster hovudgård. Eg snudde og køyrde over Ole Bulls veg, men der er det også så mykje trafikk at bilane ikkje klarer å passere kvarandre. Folk får berre ta det med ro og bli på jobb, fotel ein tipsar som er på veg heim til Os.
Hadde låg fart
Ifølgje eit vitne på staden hadde vogntoget relativt låg fart då ulykka skjedde.
– Det er jo ein lang og litt farleg sving. Det kan sjå ut som om han har fått ei punktering, i allefall er det lange svarte spor i vegen der vogntoget kom. Om det er det som har skjedd veit eg ikkje, men det ser slik ut, fortel vitnet til Midtsiden sin fotograf på staden.
Køyrd til legevakta
Mange tonn grus og stein ligg no i og like utanfor vegbanen.
– Kvinnelig førar av lastebil (26) på veg til Bg. legevakt for sjekk. Tungbilbergar på veg for å henta lastebil.
– Lastebil var lastet med stein. Ein god del av denne lasta ligg i og utenfor vegbanen. Entreprenør på veg, opplyser politiet
Rett etter klokka 15 opplyser vegtrafikksentralen at eitt felt no er opna for trafikk og at politiet manuelt dirigerer trafikken forbi.
Klokka 15.56 opplyser politiet at tungbilbergar no er på staden.
Truleg vil vegen måtte stengast i perioder for å få lastebilen på hjula igjen.